A poxa de gando frisón “Memorial José Moreira” pecha este domingo unha nova edición da Semana Gandeira de Mazaricos
![Semana Gandeira Mazaricos 22-Poxa 5](/asset/thumbnail,992,558,center,center/media/quepasanacosta/images/2022/12/04/2022120421533352519.jpg)
Mazaricos atópase inmersa na celebración dunha nova edición da Semana Gandeira. Este evento, un dos principais do sector gandeiro galego, pon en valor o carácter do municipio como principal produtor leiteiro de Galicia. Ao longo desta semana están a celebrarse distintas actividades, como as visitas escolares a granxas ou a Mesa Redonda Virtual “Situación e perspectivas de futuro do sector lácteo”.
Esta fin de semana celébranse as principais actividades, entre as que se inclúe a Gran Sesión Vermuuuu e a Poxa de Gando Frisón “Memorial José Moreira”. O sábado 2 pola mañá abrirase a exposición agraria e de servizos, un punto de encontro profesional que se manterá operativo toda a fin de semana. A partir da unha do mediodía o Trío Alborada amenizará unha espectacular Gran Sesión Vermuuuuu, con cantina xestionada polo Mazaricos C.F.
Pola tarde terán lugar obradoiros infantís e xogos populares como carreiras de sacos e zancos e tiro de corda. Tamén será o momento da cita coa boa mesa, xa que se celebrará o Concurso de Postres Lácteos no que os participantes poden acudir e presentar sobremesas en cuxa elaboración o leite sexa un ingrediente principal. Haberá premios tanto no concurso como nos xogos. No caso do concurso, o primeiro premio será unha cea para seis persoas, e o segundo, para catro. O terceiro premio será unha cea para dous. Todos os premios poderán intercambiarse por vales de comercio local a razón de 25 euros por persoa, de forma que unha cea para catro persoas poida trocarse por vales de compra por valor de 100 euros, por exemplo.
O domingo é o día grande coa celebración a Poxa de Gando Frisón “Memorial José Moreira”, que volverá poñer a Mazaricos no centro do sector de toda Galicia. Venderánse un total de 26 cabezas de gando, xovencas e primeirizas de ganderías de toda a provincia. A poxa arrincará ás 11h e nela sortearanse premios por un valor de 2.000 euros. A poxa volverá destacarse pola grande calidade dos animais á venda e polos importantes prezos alcanzados, xerando un importante volume de negocio.