O vindeiro xoves, 3 de abril, ás 12:00 horas, no Curro da Praza de Muros, terá lugar unha concentración solidaria organizada por ADISBISMUR (Asociación de Persoas con Discapacidade da Bisbarra de Muros), coa colaboración do IES As Ínsuas e o CEIP Ramón de Artaza. Esta iniciativa enmárcase dentro da campaña estatal "X Solidaria", que busca sensibilizar á cidadanía sobre a importancia de marcar o recadro de "Actividades de interese xeral consideradas de interese social" na declaración da renda.

Por que é importante marcar a "X Solidaria"?

Marcar esta opción na declaración da renda non supón ningún custo adicional para o contribuínte, pero ten un impacto directo no financiamento de proxectos sociais que benefician a colectivos en situación de vulnerabilidade. A través deste mecanismo, o 0,7% dos impostos recadados destínase a organizacións como ADISBISMUR, permitindo a mellora dos seus servizos e programas de apoio ás persoas con discapacidade.

En Muros e na súa contorna, os fondos procedentes da "X Solidaria" teñen permitido que ADISBISMUR desenvolva proxectos fundamentais para a inclusión e benestar das persoas con discapacidade. Estes recursos fan posible a adquisición de material para talleres ocupacionais, a mellora das instalacións do seu Centro Ocupacional e Centro de Día en Valadares (Outes), así como a posta en marcha de programas de formación e integración social.

Unha chamada á participación cidadá

A concentración do 3 de abril pretende non só reivindicar a importancia da "X Solidaria", senón tamén fomentar unha sociedade máis xusta e comprometida coas persoas que máis o precisan. Desde ADISBISMUR faise un chamamento á cidadanía para que se sume a esta mobilización e mostre o seu apoio a esta causa.