Cada pouco, tempo, as pantasmas pediátricas volven invador a comarca de Muros. Cada casuística laboral provoca que moitas familias queden sen un servizo básico como o de pediatría. Unha situación provisiomnal que leva máis dun ano afectando a 900 nenos e nenas de Muros e Carnota, que en moitas ocasións son atendidos por outro profesional e, no caso dos nenos e nenas de 0 a 3 anos, son derivados a Outes ou Noia os días nos que non hai pediatra.

Dende o Concello lembran que o Centro de Saúde leva máis dun ano e medio cunha baixa de longa duración do pediatra que traballaba só en Muros, mentres que  outra pediatra, que debe dar servizo algunhas horas cada semana no Centro de Saúde de Carnota, atópase tamén de baixa desde hai varios meses e o seu substituto non exerce todos os días en Muros.

Ante esta situación prolongada, a alcaldesa de Muros, María Lago, solicitoulle unha reunión urxente ao conselleiro de Sanidade da Xunta, Antonio Gómez Caamaño, “para atopar unha solución coa que recuperar a normalidade no servizo de pediatría do noso centro de saúde”.
 

Estas graves carencias no servizo provocan desde hai tempo as queixas dos veciños e veciñas de Muros, “de familias moi preocupadas como é normal pola saúde dos seus fillos e pola repercusión na conciliación laboral desta situación”, sostén a alcaldesa.
“Os concellos pequenos e medianos temos os mesmos dereitos e necesitamos un servizos públicos dignos e de calidade para manter a poboación, polo que lle solicito unha reunión urxente para atopar unha solución coa que recuperar a normalidade no servizo de pediatría do Centro de Saúde de Muros”, remata María Lago.

A resposta do Sergas

O Sergas respondeu á denuncia da rexedora asegurando que "desde a pasada semana está incorporada ao centro de saúde de Muros a pediatra titular que asume a atención de algo máis de 900 nenos e nenas, entre os deste concello e os do veciño de Carnota. Cúmprense así as recomendacións establecidas polas sociedades científicas de pediatría en España, que fixan unha referencia de 1.000 pacientes por cupo de atención pediátrica".

O Sergas volve aludir ao "déficit de profesionais especialistas de atención primaria que rexistra o conxunto de España", e bota responsabilidades ao goberno central. "Así", explica "cando a persoa titular da praza de pediatría do centro de saúde de Muros presenta unha ausencia xustificada, resulta imposible para o Servizo Galego de Saúde contratar a un profesional para substituíla".

No caso concreto dos menores de 3 anos, asguran que "son atendidos por especialistas en pediatría nos centros de saúde e Noia por razóns de proximidade xeográfica", ollo "proximidade xeográfica", sen contar que hai 30 km de Noia a Muros e 40 a Carnota... "O resto de poboación pediátrica recibe correcta atención a cargo de profesionais de medicina familiar e comunitaria, que están altamente cualificados para a atención médica ás persoas durante toda a súa vida", asegura.

"Polo tanto", conclúe, "aínda no caso de que non existan profesionais pediátricos dispoñibles para cubrir as ausencias xustificadas, a organización asistencial que realiza o Servizo Galego de Saúde garante que todos os nenos e nenas de Muros reciban a asistencia axeitada".

O conselleiro de Sanidade manterá un encontro coa alcaldesa nas próximas datas para informarlle da situación.

Máis novas