Leva anos Muxía sufrindo a problemática da invasión dos áridos da praia da Cruz na estrada que dá entrada polo norte á vila. Pero parece que por fin a Xunta vai intentar tomar cartas no asunto. Así se desprende da comisión 2ª do Parlamento galego celebrada onte, onde a unha pregunta formulada polo deputado do BNG, Oscar Insua, a directora da Axencia Galega de Infraestruturas (AXI), María Deza, informaba das medidas que vai realizar.

A AXI acometerá a eliminación do murete de formigón e o de madeira que separa a praia da Cruz da estrada, que é onde se vai acumulando area. “Veremos os efectos, pero a priori parece que as medidas non van ser moi efectivas, porque a area seguirá remontando a estrada mentres sopre o vento”, apurou Insua en resposta

Valoración do BNG de Muxía

Pola súa banda, a portavoz municipal do BNG de Muxía, Mercé Barrientos, manifestou que "levamos tempo pedindo que se actúe na AC-440 desde Berdoias ata Muxía, e moi especialmente na entrada da localidade debido á acumulación de area, o que supón un perigo para os vehículos e tamén para os viandantes, que non poden ir pola beirarrúa porque está chea de area; un día pode pasar algo grave".

Barrientos sinalou que "hai tres organismos implicados nesta situación: a Xunta, Costas e o Concello de Muxía; non é certo que a Xunta estea a realizar limpezas periódicas na estrada, e quen acometeu estes labores nalgún momento foi o Concello". A voceira nacionalista insistiu en que son necesarias "medidas definitivas", e considerou que a medida de eliminación do muro de formigón e madeira "posiblemente sexa insuficiente, pois co vento do nordés a area vai a seguir subindo e invadindo a calzada".
 

Máis novas

• Xullo 25: Volven esixir á Xunta accións para evitar a acumulación de áridos na entrada de Muxía.
• .
• Xuño 24: A area da Praia da Cruz segue invandido a estrada cando hai nordés.