A Costa da Morte, escena de rodaxe… tamén de interiores
Volve ser a Costa da Morte lugar de rodaxe. Pero desta volta, de interiores. O filme “Justicia Artificial” está a usar o Parador de Lourido como a sede de THENTHE, nome ficticio da empresa tecnolóxica que desenvolveu o software que podería substituír á xustiza tal e como se entendeu até agora. Porque “Justicia Artificial” vai ser un un thriller político dirixido por Simón Casal, e protagonizado por Verónica Echegui, Alberto Ammann, Tamar Novas e Alba Galocha que se está rodando actualmente en Galicia. Un filme que serve para reflexionar sobre o dilema moral entre mente humana versus intelixencia artificial, no ámbito da administración de xustiza.
O filme, cuio título aínda é provisonal, conta con gran participación galega, como é o propio director herculino, ou os protagonistas santiagues@s Alba Galocha e Tamar Novas.
O propio Novas daba así a súa impresión da rodaxe: “O reto foi construír un personaxe verdadeiro, mostrar a Brais sen facer trampas sendo fiel ao personaxe. Nesta película Simón tivo moita sutileza en atopar as motivacións dos personaxes máis aló do que quere conseguir co espectador, levándoo por un camiño descoñecido e que vaia descubrindo pistas”.
Pola súa parte, Galocha sinalou o seguinte: “Eu creo que o punto forte da historia é a reflexión que expón achega das intelixencias artificiais, os algoritmos, e como se están penetrando na sociedade. E non o fai desde un punto de vista de “creo que debería ser así” senón que é o espectador ou espectadora as que teñen que exporse e fai reflexionar achega diso. É interesante este diálogo, esta conversación.
