Muxía, primeiro concello da Costa da Morte afectado pola couza guatemalteca da pataca

Muxía Costa da Morte cine viejo

Muxía, primeiro concello da Costa da Morte afectado pola couza guatemalteca da pataca

09:08 26/03/18

As larvas da couza guatemalteca escarvan profundas galerías nas patacas favorecendo a súa pudrición. Imaxe: lapatata.es
Muxía, primeiro concello da Costa da Morte afectado pola couza guatemalteca da pataca

Publica hoxe a Xunta unha resolución no Diario Oficial de Galicia (DOG) pola que Muxía pasa a formar parte da zona declarada como infestada pola couza da pataca. Convírtese no primeiro concello da Costa da Morte en ser afectado por esta praga da pataca, despois de que a Consellería detectara tres casos de tubérculos afectados en plantacións de autoconsumo no municipio.

Deste xeito, o concello pasará a ter todas as medidas de control aplicadas no resto de municipios demarcados, como a prohibición de plantar patacas e o movemento das mesmas.

Agora, dacordo coa normativa vixente, no concello infestado só se poderá comercializar tubérculo embolsado e etiquetado preparado para o consumidor final, precisamente porque o movemento de pataca a granel estará, igual que no resto de concellos demarcados, prohibido.

Así mesmo tomaranse medidas polos concellos limítrofes para evitar que o insecto se estenda poa contorna. Neste caso a rede de trampeo con feromona específica disporase no interior do concello infestado co obxectivo da captura masiva e nos concellos de Cee, Dumbría, Vimianzo e Camariñas e establecerase unha contorna de protección e alerta rápida para previr a súa dispersión por zonas produtoras.

Os produtores terán que aplicar as medidas establecidas no Real decreto 197/2017 publicado polo Ministerio de Agricultura y Pesca, Alimentación y Medio Ambiente, tales como un tratamento fitosanitario durante a fase de tuberización e antes da colleita. As patacas recollidas non se poderán dedicar a semente mentres a praga non se dea por erradicada.

Charla informativa

A Consellería do Medio Rural e o Concello muxián organizan este próximo martes, día 27, unha charla á que poderán asistir os veciños. Terá lugar no salón multiusos do edificio do voluntariado.