Nos últimos anos, a Costa da Morte consolidouse como un territorio cunha intensa actividade deportiva, onde carreiras populares e probas de carácter amateur atraen a centos de veciños e visitantes en diferentes vilas. Moitos deses corredores deron xa o salto á gran cita de resistencia en Galicia: a 21 Leguas de Narón, que este 2025 afronta a súa cuarta edición.

A carreira, entre as seis ultrafondos máis duras de España, chega cun percorrido de 101 km e máis dun milleiro de participantes previstos. A conta atrás xa comezou, pois o período de inscrición permanecerá aberto só ata o 31 de agosto.

A cita deportiva, que se celebrará o próximo 27 de setembro, reúne cada ano a máis dun milleiro de participantes dispostos a completar os seus 101 quilómetros a pé ou en MTB en menos de 24 horas.

O percorrido, considerado o máis duro de Galicia e entre os seis máis esixentes de España, atravesa paisaxes singulares e enclaves únicos: desde o interior do estaleiro de Navantia ata o arsenal militar, pasando por Monteventoso, Valdoviño, Pantín ou o túnel da Graña. Un itinerario que non só supón un desafío deportivo, senón tamén unha oportunidade para descubrir a riqueza paisaxística, cultural e patrimonial da costa Ártabra, en sintonía co atractivo crecente da Costa da Morte como destino de turismo activo e deportivo.

A carreira non só destaca pola súa dureza, senón tamén polo seu crecemento internacional, o aumento da participación feminina e o seu compromiso coa inclusividade, con presenza de atletas con diversidade funcional. Ademais, este ano
contará con música, puntos de animación e máis de 10 avituallamentos que converten a experiencia nunha auténtica festa do ultrafondo. Todo iso co apoio de centos de voluntarios que fan posible cada edición.

“Cada edición sorpréndenos a acollida que ten a proba. Vemos como medra o interese, non só entre corredores de toda España, senón tamén a nivel internacional. Para nós é un orgullo que Narón e Galicia estean no mapa do ultrafondo”, explica Óscar Somorrostro, director da 21 Leguas de Narón.
Eventos como a 21 Leguas de Narón contribúen así a situar a Galicia, desde o golfo Ártabro ata a Costa da Morte, como un referente internacional no ámbito do ultrafondo e do turismo deportivo.