O Couto refrenda a sintonía de Neira Vilas na Costa da Morte

Ponteceso Cultura

18:30 20/10/14

Voltaba unha das grandes lendas vivas da literatura galega á Costa da Morte. E como non, facíao á Casa dos Veciños do Couto, onde tantas veces ten estado contando as súas historias. O escritor e académico da lingua galega Xosé Neira Vilas presentou o seu libro máis costeiro, ‘Con Anisia Miranda na Costa da Morte’ ante unha marea de veciños da zona, entregados á súa sabedoría e cercanía.

De feito, a pesar da súa aparente debilidade, aos seus 86 anos, é destacable a súa incansable forma de contar, e a súa proximidade, deixándose querer e afianzándose coma o que é, xa un mito da cultura costeira e galega. O autor demostrou o seu amor e compromiso por esta terra salgada, que leva viistante dende hai moitos anos.

Neira Vilas fixo unha viaxe polas últimas dúas décadas culturais da Costa da Morte. Unha colleita de anécdotas e datos das súas visitas costeiras, ben recollido, i é que todos salientaron o ordenado que é.

Neira Vilas estivo acompañado pola brava voluntaria local Tamara Lema, por Xosé María Varela, como representante da Fundación Eduardo Pondal, o Secretario de Política Lingüística Valentín García e o director da editorial Embora Miguel Toval.

Ademais de verbas, houbo tempo para a música, para despedir como se merece un dos tesouros da nosa lingua.