A Fundación Eduardo Pondal abre o prazo de inscrición para unha nova xeira da Escola de Verán

09:20 04/07/11

A Fundación Eduardo Pondal abre o período de inscrición para alumnos e alumnas de 3 a 17 anos para que participen nunha nova edición da Escola de Verán que este ano se desenvolverá desde o luns 11 de xullo ata o domingo 14 de agosto. As datas de inscrición son as seguintes: os luns xoves e venres de 18.00 a 20.00 h; os sábados de 10.30 a 13.30 h.

Establecéronse dous grupos de alumnado de acordo á súa idade e ás tarefas a desenvolver. O primeiro grupo, conformado por alumnado de 3 a 10 anos, desenvolverá as súas actividades na Fundación Eduardo Pondal. Con eles estarán as monitoras Tamara Lema Rodríguez, Sofía Araceli González Fondo, Uxía Varela Bermúdez, Lucía Blanco Tedín, David Amado Baneira e Teresa Lema Pérez. Desenvolverán tarefas de oralidade, arte, música, danza, xogos e predeporte. A coordinadora deste grupo de alumnos e monitoras será Patricia Bellón Mato.

O segundo grupo desenvolverá as súas tarefas na Casa dos Veciños. A el acudirán alumnos de 10 a 17 anos. Como docente, contarase coa presenza diaria de Daniel Puente Bello (fillo de Xabier Docampo). Os monitores serán Rodrigo García García e Andrea Varela Mato. A coordinación deste grupo e o asesoramento histórico correrá a cargo de Luís Giadás Álvarez. Este grupo desenvolverá actividades relacionadas con Pondal e as novas tecnoloxías. As propostas son as seguintes: aprendizaxe na obtención de imaxes fotográficas e videográficas, montaxe de vídeos, traballo de campo, localización xeográfica de topónimos pondalianos, leccións de patriminio e historia, leccións de toponimia. Para o traballo de campo tomarase como base o traballo “Toponimias del pequeño valle de Puenteceso”, obra de Eduardo Pondal. Ademais, contarase coa presenza de dous convidados coñecedores da toponimia galega e do patrimonio da Costa da Morte como son Fernando Cabeza Quiles e Evaristo Domínguez Rial.

Outros convidados que acudirán a esta Escola de Verán serán Carlos Conde, Ricardo Pérez Veres, Fran Alonso, Xurxo Souto, Xabier P. Docampo, Magín Blanco, os gaiteiros do Centro Coreográfico Galego, Guadi Galego, Alba Costa, Silvia Losada, Diana Varela Puñal, José Antonio Touriñán. Os convidados aparecerán pola escola os martes e os venres.

Ademais realizaranse tres saídas. No mes de xullo irase á Fundación Neira Vilas durante todo o día. No mes de agosto, acudirase á casa natal de Eduardo Pondal e acudirase a unha nova representación das Noites do prácido luar.

Para o venres 12, a modo de fin de escola, programouse Expo Clausura na que, en horario de noite, se realizará unha exposición de produtos e se proxectarán os vídeos creados na mesma.