Pondal vibraría se ollase o programa cultural de outono que prepara a AVV Monte Branco

Ponteceso Cultura

19:38 29/09/10

Nunca a Eduardo Pondal se lle dedicou un ciclo de actividades tan ambicioso e variado como o que desenvolverá a Fundación Eduardo Pondal ó longo de todos os martes do mes de novembro. Todas as actividades que a Fundación Eduardo Pondal teñen realizado ata agora, quedarán eclipsadas por un proxecto de formación e divulgación cultural que se irá debullando en horario de mañá, mediodía, tarde e noite, así como se dirixirá a todo tipo de público tanto escolar como adulto, e entre os adultos están os pais e nais dos escolares do concello. O programa desenvolverase durante todos os martes do mes de novembro de 2010 e artéllase en seis ciclos de actividades: “Creatividade pondaliana”, “Aula viaxeira pondaliana”, “Encontros pondalianos”, “XIV Simposio Pondaliano”, “Libros pondalianos” e “Cestería viva”.

“Creatividade pondaliana”

En “Creatividade pondaliana” ofértanse obradoiros de música tradicional, de danza contemporánea, de teatro e representacións teatrais para público escolar do concello, desde os máis cativos da Escola Infantil A Galiña Azul ata o alumnado de Primaria de Ponteceso e Corme. Os obradoiros de música e danza estarán impartidos por profesionais do Centro Coreográfico Galego e os de teatro por actores profesionais de Caramuxo Teatro. Este grupo representará tamén tres obras: «Zapatos», «Historia dunha semente» e «Mensaxe sen botella».

“Aula viaxeira pondaliana”

Na “Aula viaxeira pondaliana” o historiador Luís Giadás aproveitará os espazos e topónimos de Corme e Ponteceso que aparecen na obra pondaliana para convertelos en recursos educativos ó aire libre. A esta aula fóra do centro acudirá alumnado dos CEIPs As Forcadas de Corme e Eduardo Pondal de Ponteceso.

“Encontros pondalianos

Nos “Encontros pondalianos” estableceranse sesións de aprendizaxe de prestixiosos conferenciantes sobre Pondal ou sobre temas pondalianos con alumnado de Bacharelato e Secundaria. Estes encontros teñen a particularidade de se celebraren fóra de horario lectivo o cal será moi meritorio a presenza do alumnado ós mesmos durante o seu tempo libre. A listaxe de relatores é de vertixe: Manuel Ferreiro (o maior especialista na figura de Eduardo Pondal), Xesús Ferro Ruibal (creador e presentador do programa Ben falado da TVG), Sechu Sende (especialista en sociolingüística), Anxo Angueira (unha das voces máis orixinais sobre o mundo poético de Rosalía de Castro) e Darío Xohán Cabana (académico da RAG, un dos poetas máis importantes da lírica galega contemporánea e colaborador diario de La Voz de Galicia nas páxinas de pasatempos cos encrucillados en lingua galega).

“XIV Simposio Pondaliano”

O “XIV Simposio Pondaliano”, tras varios anos de ausencia, retoma o seu fío de celebracións despois de trece edicións que, no pasado, foron o punto de arranque para que a Fundación Eduardo Pondal fose hoxe unha realidade. Os patróns da Fundación opinamos que sen o labor dos anteriores Simposios Pondalianos a Fundación hoxe non existiría. O Simposio continúa a liña formativa para profesorado da Costa da Morte que viña realizando no pasado. Nestes momentos hai unhas 20 persoas inscritas e infórmase que o prazo continúa aberto ata o día inaugural. O Simposio desenvólvese diariamente en dúas sesións. Unha primeira, de carácter máis formativo, na que participan todos os relatores que sinalamos nos “Encontros pondalianos” e que comeza ás seis da tarde. Unha segunda, de carácter máis lúdico, na que se presentarán propostas de normalización, audiovisuais, recitais cívicos, musicais e libros sobre a comarca. Nesta segunda xeira intervirán Alba Calvo, Alba Costa, Silvia Losada, Xosé Manuel Varela, Antonio Reigosa, Omar Rabuñal, Luís Giadás e Fantoches Baj.

“Libros pondalianos”

O apartado “Libros pondalianos” consistirá nunha mostra de libros en lingua galega cedidos pola librería A Tenda dos Libros. Nela terán presenza importante a bibliografía pondaliana.

“Cestería Viva”

E no apartado “Cestería Viva” exhibirase a exposición de cestería que leva como título “Do Courel ó Monte Branco” montada pola mestra cesteira Lola Tourón e na que se pode observar as distintas modalidades de traballo e uso de materiais no mundo da cestería.