Ponteceso e Cabana recuperan a memoria dos seus maiores

09:50 03/02/11

Se xa temos contado como se desenvolve o fantástico programa cultural do Concello de Cabana do "Inverno da Memoria", hoxe damos conta das novas iniciativas sociais que se desenvolven tanto no concello cabanés como no de Ponteceso. Ambos apostan por un Obradoiro de Memoria para maiores, un taller no que os alumnos aprenden novas ferramentas para axilizar as súas mentes.

En marcha o Obradoiro en Neaño

Xa está en marcha, desde o pasado 12 de xaneiro, o habitual Obradoiro de Memoria para Maiores que desenvolve anualmente o departamento de Servizos Sociais que coordina Cristina Morandeira Muíño. As actividades realízanse todos os mércores en horario de 5 a 6 da tarde.

A este Obradoiro de Memoria inscribíronse 20 persoas maiores do concello de Cabana de Bergantiños e 7 do Centro de Día. As sesións son impartidas por Jéssica Pérez, monitora da empresa Breogan de Xestión).

A presente é unha actividade gratuita e consiste nun taller para o adestramento das habilidades cognitivas e perceptivas básicas (atención, memoria, percepción…). Como xornada salientable, destacar que o pasado día 26 os maiores realizaron unha sesión de recordo das vellas escolas de Cabana de Bergantiños; é decir, puxeron en práctica a “memoria a longo prazo”. Para iso, desprazouse a Neaño, Ángel Eiroa, quen tomou interesantímas notas que serven para o proxecto Inverno de Memoria que se está a desenvolver ó longo das parroquias cabanesas.

Taller de Memoria en Corme Aldea e Corme Porto

Lugar: Fogar dos pensionistas de Corme Aldea e Casa do Mar en Corme Porto.
Horario: dende o 15 de febreiro ao 10 de maio.
- Corme Aldea: martes de 11:15h a 12:15h,
- Corme Porto: martes de 10:00h a 11:00h,
Destinatarios: maiores de 55 anos.
Inscricións: no Fogar do Pensionista de San Adrián de Corme Aldea ou na Oficina Municipal de Corme antes do 10 de febreiro.

Este Obradoiro é unha das actividades do programa de Envellecemento Activo subvencionado pola Deputación da Coruña.