Carballo e A Laracha son pioneiros, pero Santa Comba sobe ao carro do Contedor Marrón, con 2 anos de marxe sobre as directrices da Unión Europea. A finais de 2023 todos os Concellos terán que recoller, por separado, a fracción orgánica no quinto contedor, e son poucos os que están traballando para axilizar o proceso.

Santa Comba é un deles, e este venres foi a presentación en sociedade deste programa de recollida de biorresiduos. Unha comitiva da Xunta achegouse á capital xalleira, para visitar o expositor de Sogama sobre o contedor marrón para materia orgánica no marco da Semana europea da prevención de residuos.

Así, Santa Comba hoxe realizará – a través da empresa Coregal- o primeiro servizo de recollida de contedor marrón, que enviará a Sogama, para converter o material orgánico en compost de calidade para usar na agricultura e xardinería; é dicir, poñer en práctica o lema da campaña “o marrón, o contedor que devolve vida”.

A cita serviu tamén para repartir entre a veciñanza parte dos primeiros 2.000 quilos de compost “certificado” producidos na planta de Cerceda, como fixeron A Laracha e Carballo a semana pasada co seu propio compost creado durante o primeiro ano de andaina medioambiental

Novas relacionadas

• Centos de veciñ@s de Carballo e A Laracha usan a primeira fornada do compost urbano do programa #TitesaChave.