A artesanía mantén vivo o Castelo de Vimianzo
É o Castelo de Vimianzo unha das atraccións culturais máis interesantes da nosa bisbarra. E parte da culpa é desa ducia de artesáns que enchen o castelo con seu patrimonio vivo. O Centro de artesanía en vivo permite asomarse ao obradoiro dun artesán, observar a labor dos vellos oficios ou facerse cunha peza única. Unha experiencia difícil de atopar noutro lado.
Deste modo a artesanía convértese en Vimianzo nunha das principais aliadas para romper coas rutinas museísticas e ampliar a experiencia cultural na nosa visita.
Para completar esta proposta, o Concello de Vimianzo responsable da xestión de actividades do Castelo, incentiva un programa artesanal ao longo de todo o ano: exposicións, encontros, demostracións e outras actividades, realizadas sempre en colaboración coas traballadoras e traballadores artesáns que teñen na fortaleza vimiancesa o seu obradoiro e principal punto de venda.
Esta semana será a vez de Esther Ferreiro, especializada na xoiería de prata e cristal de Murano, a súa manufactura está recoñecida co selo de calidade “Artesanía de Galicia”. A artesá de Santa Comba inaugurará o próximo sábado unha mostra moi especial, transformando a vella cociña da fortaleza cunha orixinal montaxe expositiva ideada para enmarcar a mostra “Unha xanela á beleza”. A exposición resultado dunha longa investigación por parte de Ferreiro, introduce por primeira vez a madeira na súa produción, indagando sobre as distintas texturas e as contrastadas sensacións entre o vidro e o frío metal coa calidez das madeiras nobres.
A mostra poderase contemplar na cociña do Castelo de Vimianzo do 24 de marzo ao 24 de abril.
Novas relacionadas
- O Castelo de Vimianzo recibe máis de 30.000 visitantes en 2017.
- As Torres do Allo mudan o seu horario de visita
- O programa cultural “Vimianzo, historia viva” suma novos éxitos
- O programa de actividades de verán de Vimianzo potencia os recursos patrimoniais do municipio.
- 1.700 escolares derrubaron as portas do Castelo de Vimianzo coas visitas guiadas.
- Lucho Penabade: “O Castelo de Vimianzo e as Torres do Allo son os escenarios ideais para as visitas teatralizadas”.
- 10 artesáns da Costa da Morte manteñen vivo o Castelo de Vimianzo.
Fonte
- Redacción de QPC ([email protected]).
- Concello de Vimianzo