Non cansamos de dicilo. A aposta pola programación continúa parécenos fundamental para manter vivas esas infraestruturas culturais tan xigantes que erguimos durante os anos de bonanza. E por Vimianzo o teñen claro, e cada semestre arman unha completa axenda de eventos que fan que a veciñanza teña sempre na cabeza, que o domingo hai “algo” na Casa da Cultura.

E xa van dous meses dende que arrincou o novo semestre cultural vimiancés. E o “Febreiro pequeneiro” chegou ao seu fin con grande éxito de público os domingos no Auditorio da Casa da Cultura de Vimianzo. Pequenos e maiores, chegados de toda a Costa da Morte, puideron gozar este mes de actuacións musicais e teatrais galegas para dirixidas a diferentes idades. Migallas coas cancións de Pan de Millo; Redrum Teatro, coa fábula Roedores; e a Compañía Animundis do vimiancés Benxamín Queiro, mestura de música e teatro, que conseguiu encher o Auditorio na súa estrea en Vimianzo.

Grandes nomes para o Marzo Lareteiro

O cambio de mes trae tamén cambio de temática e de público. “Marzo lareteiro”, un mes cheo de historias con coñecidos e recoñecidos contadores da nosa terra, dirixidos para o público adulto, todos os domingos de marzo ás 20 horas. Comezará o día 1 co carnotán César Cambeiro, un habitual do teatro e da ficción galega, que nos traerá historias 2.0, dúas lendas tradicionais apuntaladas con contos, risas e retranca. Unha hora para descubrir o humor e as mentiras dos libros de historia. Collerá o relevo de Cambeiro, un habitual neste mes do auditorio vimiancés, Cándido Pazó, que centrará o seu monólogo en Historias con nome de muller, aproveitando que a súa contada será o 8 de marzo, Día internacional da Muller. Celso Fernández Sanmartín acompañaranos o seguinte domingo coa súa habitual retranca debullando contos e historias da vida e da tradición oral. E dúas mulleres serán as protagonistas dos dous últimos domingos, a televisiva Isabel Risco coa superheroína galega Naviza Girl; e para rematar o ciclo de contadas Charo Pita traerá contos de amor, erotismo e morte.

As risas estarán aseguradas no Auditorio da Casa da Cultura os domingos deste mes de marzo. A entrada, coma sempre, de balde.

Xa sabedes, por certo, que tendes todas as citas debulladas en www.axendacostadamorte.com).

• Volve a programación cultural semestral á Casa da Cultura de Vimianzo.
• Programación continua, receita para encher os auditorios.

Fonte

• Concello de Vimianzo.