A Semana Santa de Vimianzo terá cor infantil

A Semana Santa de Vimianzo terá cor infantil

09:05 30/03/12

A Semana Santa está ás portas e os nenos e nenas teñen unha semana completa de vacacións por diante. Para favorecer a conciliación da vida laboral e familiar, o concello de Vimianzo organiza diferentes actividades para os máis pequenos. Os nenos e nenas de 3 a 6 anos poderán participar o luns, martes e mércores, de 16 a 18 horas, nos obradoiros de pascua, animación e cine infantil. Para os nenos e nenas a partir de 7 anos organizáronse tamén obradoiros de pascua, animación e cine o luns e o martes e o mércores poderán converterse en auténticos detectives participando no gran roubo, un xogo de pistas na busca dun antigo libro de valor incalculable que desapareceu misteriosamente. Para participar nestas actividades haberá que inscribirse previamente na Casa da Cultura. Por outra banda, dentro do programa de animación á lectura, o sábado haberá na biblioteca municipal un obradoiro de titiritadas, a cargo das monitorias municipais, a partir das 17 horas para pechar o mes do teatro para as crianzas.

Obradoiro de cestería para adultos

Pasada a Semana Santa o concello organiza coa colaboración de diferentes asociación culturais uns obradoiros de cestería para adultos en catro parroquias: Vimianzo, Salto, Carnés e Berdoias. En Vimianzo os obradoiros terán lugar na Casa da Cultura os luns de 2.30 a 22.30 desde o 23 de abril ata o 28 de maio. En Carnés os obradoiros serán os mércores de 18 a 20 horas no Centro Cultural, desde o 25 de abril ata o 30 de maio. Os mesmos días serán tamén en Salto, no Local Parroquial de Castromil, en horario de 21 a 23 horas. En Berdoias os obradoiros realizaranse no Centro Cultural os sábados, de 17 a 19 horas, desde o 5 de maio ata o 9 de xuño. As persoas interesadas en participar nestes obradoiros gratuitos deberán inscribirse previamente ata o día 19 de abril.