Hai meses que varios puntos de verquido de augas fecais contaminan o río de Vimianzo ao seu paso polo paseo fluvial. En dous Plenos da corporación a voceira do grupo municipal Adiante Vimianzo informou e requiriu do concello os traballos para a súa eliminación. “Non pode ser que augas no paseo fluvial estean continuamente contaminadas”, comentou Marta Rey.

A Alcaldesa, no pleno de xuño, contestou que descoñecía ese problema pero que axiña daría as indicacións para arranxalo. No pasado pleno do mes de xullo e dado que a situación continua igual, con unha boa parte do río contaminado polas augas fecais, reiterou Adiante Vimianzo “a necesidade de reparar de inmediato ese verquido, que logo de indicar a alcaldesa que xa fora atendido este tema, admitiu unha nova avaría da que non tiña coñecemento. Unha semana despois os verquidos calquera veciño pode comprobar que os verquidos continúan”.

Segundo o grupo, “os puntos de vequido correspóndese con dous pozos de bombeo que están permanente avariados. Un deles recolle o 90% das augas fecais da vila, ao carón da vella depuradora en desuso”. “Todo parece indicar un mal funcionamento das bombas, que debería ter inmediata e fácil solución”, refire a voceira de Adiante Vimianzo. Por este motivo o grupo municipal é moi crítico co goberno municipal, a quen acusa de ter en abandono total este problema. “Parece que non lles importa nin o río nin o paseo fluvial”, volve a dicir a voceira.

Recordan que “non se trata dun problema nun período de choivas que inunda os colectores porque o problema persiste no verán, coa minoración da augas pluviais”.