A banda en euskera máis escoitada da actualidade súmase ao Asalto ao Castelo

O Asalto ao Castelo de Vimianzo segue sumando irmandiños para a súa 29ª edición (3 e 4 de xullo) e acaba de confirmar a En Tol Sarmiento (ETS) como nova incorporación.

A banda vasca, que vén de facer historia enchendo o BEC de Barakaldo con 45.000 persoas, chega a Vimianzo no seu momento de máxima proxección mediática trala súa visita ao programa "La Revuelta" de TVE esta semana. 

Con esta confirmación, ETS únese a un cartel que xa conta con Dakidarría, Che Sudaka, De Ninghures, Ulex e Yaya DJ, consolidando unha fin de semana de música de primeiro nivel na Costa da Morte. 

Aínda que a distribución por días manterase en segredo até completar todos os nomes, dende a organización —composta polas asociacións Cherinkas e AXVALSO xunto ao Concello de Vimianzo— apostan por un festival de dous días, o 3 e o 4 de xullo, onde tanto o venres como o sábado contarán con cabezas de cartel de primeiro nivel.

Novidades en accesos e abonos

Cabe lembrar que, como principal novidade nesta edición, será necesario dispor de entrada para acceder ao recinto de concertos tanto o venres como o sábado. Os abonos promocionais para vivir a experiencia completa desta Festa de Interese Turístico de Galicia están dispoñibles con prezo reducido en
asaltoaocastelo.gal.