A concelleira do Bloque Nacionalista Galego no Concello de Vimianzo, María Lorena Suárez Pazos, vén de presentar a súa renuncia á acta “nun exercicio profundo de honestidade persoal, profesional e política”, sen abandonar o seu compromiso político nin os valores nacionalistas. A renuncia farase efectiva no vindeiro pleno municipal, que se celebrará o venres 6 de febreiro.

“Non deixo a política nin o BNG; simplemente estou sendo coherente coa miña maneira de entender a responsabilidade, tanto coa veciñanza vimiancesa como coas persoas que dependen de min no día a día”, explica Suárez Pazos. Continuará exercendo como responsable local do BNG de Vimianzo, reafirmando a súa vontade de seguir traballando por un concello e unha Galiza máis xustos, feministas e sustentables desde todos os espazos posibles: o partido, o ensino público, o ecoloxismo e o activismo social.

A renuncia está motivada polo desexo de atender o coidado do seu fillo nos primeiros anos de crianza; mais tamén pola súa condición de docente no IES Terra de Soneira, centro que, segundo a concelleira, “sufriu unha redución de profesorado e isto derivou de maneira notable no aumento da carga de traballo do cadro docente”.

Neste contexto, os seus horarios laborais coinciden cos plenos e coas comisións municipais, obrigándoa a ausentarse das aulas. “Aínda que estas faltas están xustificadas administrativamente, non me parece xusto nin para o meu alumnado nin para a miña ética profesional”. Eu quero estar nas aulas, acompañar, dar continuidade ao traballo educativo e non sentir que fallo a quen máis precisa estabilidade”, sinala.

María Lorena Suárez Pazos deixa claro que esta decisión non supón unha retirada da primeira liña política, senón un paso necesario neste momento da súa vida. “Cando a crianza deixe de ser tan dependente, estarei de novo aí, porque nunca marchei nin marcharei das miñas conviccións”, asegura.
Como anécdota reveladora do funcionamento actual do Concello de Vimianzo, lembra que “talvez no meu último pleno, me concedan o uso da palabra para despedirme, xa que en ningún pleno municipal ma quixeron dar. E este silencio imposto tamén di moito de como se entende a democracia neste concello”, afirma, sinalando a necesidade dun cambio profundo baseado no respecto, na igualdade e na escoita real de todas as voces da corporación.