Nestas tensas xornadas que sofre a bisbarra nesta praga transitoria de lumes, estanse extraendo tamén cousas positivas. Como a reacción da veciñanza que leva demostrando que é a mellor defensa para os nosos montes.

Así quedou patente en Corme, tanto arriba en Guxín e Corme Aldea coa veciñanza en primeira liña, como con esa imaxe xa icónica das cisternas dos tractores recargando auga salgada (mellor é doce, pero...) na Ribeira, mentres ao outro lado da ría, a confraría tiña mobilizada a todos os patróns por se tiñan que evacuar á vila cormelá.

Tamén pasou en Xaviña, onde a cercanía ás casas propiciou que moitos veciños e veciñas se xogasen a vida para salvar as súas pertenencias das lapas.

A veciñanza estaba preparada tamén en Dumbría, onde houbo varios intentos; fixo o propio con conatos en Canduas e Frixe durante estes días, pero un dos mellores exemplos foi en Recesinde, parroquia de Carantoña, Vimianzo.

Aconteceu este martes 6 de agosto, cando arredor das 13:30 horas, prendía un lume, presuntamente intencionado, a apenas 50 metros das vivendas familiares, poñendo en serio perigo a vida e as propiedades de varias familias. Pero grazas á rápida intervención dos veciños, así como dos bombeiros e da Garda Civil, o incendio puido ser controlado a tempo.

A coordinación foi crucial para evitar unha traxedia maior, pero entre todos conseguiron salvar as catro casas que estaban ameazadas polas lapas.

Máis novas