Xoves. 28.03.2024
El tiempo

A parroquia zasense de O Allo sóbese á rede

A parroquia zasense de O Allo sóbese á rede
parroquia-o-allo-concello-zas Na páxina web do Concello de Zas pódese atopar información detallada sobre cada unha das súas parroquias Xa están chegando ao seu fin as entregas que fai todos os meses o concello de Zas dentro do programa "Zas polo miúdo", unha iniciativa que consiste en colgar na rede información detallada sobre todas e cada unha das parroquias que integran o municipio. Nesta ocasión, é o turno da freguesía de O Allo que, debido á súa riqueza artística e monumental, houbo que dividir a información en dúas partes (a 2ª parte colgarase na web municipal o próximo mes). Nesta primeira parte expóñense os principais datos acerca da súa xeografía, toponimia e a historia do primeiro pazo de Galicia: as Torres do Allo. Como nos casos anteriores, a documentación está e elaborada por Evaristo Domínguez Rial e Xosé Manuel Lema e información pode consultarse na páxina web municipal (www.concellodezas.org). A parroquia de San Pedro de O Allo está formada polos lugares de O Allo, Casas Novas, A Cebola de Abaixo, A Cebola de Arriba, Os Muíños, Muriño, O Pombal, Regalado, Xerne e O Regueiro do Allo – recentemente habitado – que suman en total unha extensión de sete quilómetros cadrados situados no punto máis o norte do concello de Zas. En canto á súa demografía, a parroquia de Allo sempre tivo poucos habitantes pero tamén é a única freguesía de todo o concello que non perdeu poboación dende o ano 2000; incluso medrou nun 3,03%. A 1 de xaneiro de 2017 contabilizábase un total de 158 habitantes, un dato que dista moito dos 3 veciños que se pensa que había no ano 1607. Durante os anos 1820 e 1823 O Allo foi concello e xunto cos concellos de Zas e Muíño pertencía ó partido xudicial de Vimianzo e á provincia única de Galicia; unha condición que perdeu co restablecemento do absolutismo e a volta ó Antigo Réxime. Nesta primeira entrega, os autores falan sobre a orixe do topónimo que, tal e como sinalan, hai catro teorías diferentes. As Torres do Allo visita-teatralizada-torres-do-allo Durante a tempada alta, o pazo das Torres do Allo ofrece visitas guiadas teatralizadas As Torres do Allo, considerado como o primeiro pazo galego, ubícanse nesta parroquia. Neste capítulo de “Zas polo Miúdo”, os autores fan un repaso sobre distintos aspectos deste monumento que hoxe é parada obrigada dentro do xeodestino Costa da Morte. O edificio e os terreos circundantes son propiedade da Deputación da Coruña desde o 1998. Tras un convenio co ente provincial, o Concello de Zas – a través da súa concellería de Cultura – é o encargado da xestión de vistantes. Mes a mes, as cifras van en aumento grazas, en parte, ao programa de actividades paralelas entre as que se enmarca unha visita teatralizada que ten moito éxito entre os visitantes. E co propósito de serguir medrando, o concello poñerá en marcha no próximo mes de maio un programa dirixido a centros educativos con distintas unidades didácticas. No próximo mes de maio está previsto subir a segunda parte da parroquia de O Allo á web municipal na que se ampliará información sobre a igrexa parroquial de San Pedro de O Allo, os escudos das Torres e da Igrexa, documentación histórica, persoeiros relevantes, os bens patrimoniais da parroquias así como outros elementos singulares tales como o souto, a fonte, o cemiterio, os muíños, etc.

Máis información

Novas relacionadas

Máis novas

Fonte

Comentarios