As Torres do Allo dobran en xullo as visitas do mesmo mes do ano anterior

08:05 09/08/18

Durante os meses de verán o pazo abre todos os días da semana e oferta dúas visitas guiadas ao día Continúan en aumento as visitas nas Torres do Allo. E van tanto en aumento que incluso se dobrou o número do ano pasado. No que vai de ano - do 1 de xaneiro ao 31 de xullo - foron máis de 4.000 os visitantes que se achegaron ata o pazo vén para visitalo ou vén para relizar algunhas das actividades programadas. O dato supera xa aos visitantes de todo o ano 2015 e tamén aos do 2016. Por meses, o de xullo foi un dos mellores de todo o ano xa que as Torres do Allo recibiron máis de 1.500 visitantes o mes pasado o que supón un incremento de máis do 50% con respecto ao mesmo mes do ano anterior. Unha media de 51 persoas ao día achegáronse para visitar libremente o museo, realizar as visitas guiadas, o xogo de pistas, asistir ás visitas teatralizadas, ou participar das actividades especiais como o concurso de fotografía ou o día nas Torres para os máis novos. Un dato salientable tendo en conta que en xullo as Torres do Allo abriron tódolos días. Escape Room Actividades como o Escape Room - a actividade que arrasa este ano nas Torres do Allo - provocaron un cambio de tendencia no perfil do visitante. Este xogo de escapismo conseguiu atraer ao pazo á mocidade de entre 16 e 30 anos, un público que antes se situaba á cola das estatísticas e que agora vén de duplicar os seus datos con máis de douscentos mozos e mozas. En canto á procedencia dos visitantes destaca no mes de xullo o público chegado dende distintos puntos do territorio con máis dun terzo do número total. Os galegos e galegas país constituíron o grupo máis numeroso cun 43% das visitas totais. As persoas procedentes da Costa da Morte foron algo máis de douscentas, un 14%; mentres que os visitantes do propio concello de Zas non pasaron do 8%. Corenta e cinco persoas chegaron tamén doutros países europeos.