O físico Jorge Mira presenta mañá no auditorio de Baio o seu novo libro "A que altura esta o ceo?" Jorge Mira é un veciño da Costa da Morte que non necesita presentacións. Mañá venres volve como todas as fins de semana a Baio - a súa terra natal - pero coa única diferenza de que ás 21:15 horas presentará no auditorio da vila o seu último libro: "A que altura está o ceo?". No acto tamén intervirán a escritora María Canosa, o xornalista Santigo Garrido, o alcalde de Zas, Manuel Muíño e o editor de Alvarellos, Henrique Alvarellos.

• QPC: Ainda que xa sabemos que a resposta da altura do ceo está no teu libro, ¿podes dicirnos se o ceo está a mesma altura en Baio que en Brasil?

No que atinxe ao ceo diúrno - dependendo do sitio considerado de Brasil - podería variar un pouco xa que esa altura do ceo diúrno débese ao como se apreta a atmosfera nas capas máis cercanas á terra, e entre as zonas tropicais e Baio hai algún matiz que podería afectar.

• QPC: ¿Cal é o teu lugar preferido da Costa da Morte para observar o ceo?

Ui, sen discusión, dende a tumbona que hai na terraza da miña casa. É dende onde fixen a meirande parte das observacións do ceo na miña vida. Desgraciadamente, cada vez é máis difícil observalo dende una vila coma Baio, por mor da contaminación lumínica que hai. Cantas farolas sobran no mundo occidental!

• QPC: ¿Esperabas que "A que altura está o ceo?" fose o segundo ensaio máis vendido en Galicia segundo o Taboleiro do Libro Galego?

A verdade é que foi toda unha sorpresa ese dato de vendas de marzo, máxime tendo en conta a gran cantidade de títulos que saen continuamente. Sen dúbida axuda o feito de termos deseñado un libro que busca chegar a amplísimos sectores de poboación.

• QPC: ¿Con que se vai atopar o lector?

Vaise atopar coa historia dun reto que comezou nos albores da humanidade e que, curiosamente, remata na nosa época. Cando digo que remata na nosa época refírome a que é precisamente nestes anos cando se respondeu a pregunta de modo definitivo e sabemos o tamaño último do Universo: a altura final á que está o ceo. Dende a Grecia clásica - s. III a.C. -, a altura calculada do ceo fora ascendendo con moitos traballos, pero nunca era un valor definitivo, porque se sabía que había algo máis aló. O que temos agora éo. Iso si, ollo coas arrogancias de sentírmonos no cumio do progreso, porque no mesmo momento no que soubémo-lo tamaño do Universo xurdiu unha sorpresa que nos fixo ver que había aínda moito máis que descoñecíamos del.

• QPC: ¿É un libro para todos os públicos?

Totalmente. María Canosa e máis eu dedicamos moito tempo a valora-lo enfoque que cumpría para ter a maior base posible de lectores. Diría que a partir dos 11 anos xa é posible seguir este libro.

• QPC: Supoño que escribir un libro sobre a ciencia para o público xeral, terá detrás de sí unha enorme dificultade...

Hai moitísimo traballo detrás deste libro. O primeiro texto acabouse de escribir cando pasou a sonda "Novos Horizontes" por Plutón, a mediados de xullo de 2015, pero dende ese momento aínda tivo que pasar medio ano para te-lo libro listo: faltaba o traballo cos múltiples debuxos, retoques estéticos de todo tipo,... mesmo houbo que retocar algúns parágrafos para que encaixasen visualmente no produto final. Á parte de María Canosa e os debuxos de Dani Padrón, o rol do editor Henrique Alvarellos foi relevante na obra final. Por así dicilo, vén sendo un libro a catro mans.

• QPC: Mañá presentas o novo libro en Baio, na túa terra natal. ¿Que significa iso para ti?

Síntome rarísimo. Fago multitude de actos por Galicia adiante, pero curiosamente en Baio non teño intervido tanto. Claramente hai uns nervios distintos.   Novas relacionadas

• Aprendendo curiosidades científicas con Jorge Mira.
• Rosalía e Jorge Mira comparten tesouros con Fernando Blanco
• Un novo Premio Nóbel que coñece a fin da terra con Jorge Mira
• Un novo premio crítico para Jorge Mira.
• Un Nobel máis que coñece a fin do mundo da man de Jorge Mira
• Jorge Mira achega a Hawking ata á fin do mundo.
• Jorge Mira recibe o premio de Ensinanza da Real Sociedade Española de Física.
• As vogais da TVG teñen acento da Costa da Morte.
• As entrevistas do GDR: Jorge Mira.

Fonte

• Redacción QPC ([email protected]).