Baio convertiuse na capital do audiovisual galego por unha fin de semana co gallo da IV edición dos Premios Fouciño. Organizados pola A.C do mesmo nome e o Concello de Zas, estes galardóns audiovisuais puxeron ao fin a 5 días de actividades o pasado sábado cunha gran festa final na que o público encheu a carpa habilitada na praza Jorge Mira para ver a entrega de premios e os concertos de Caamaño&Ameixeiras, Pantis, Copa Turbo e Afundín Jamallos. 

A afluencia de público foi unha constante de toda a xornada, xa que durante as proxeccións das curtametraxes finalistas, realizada pola tarde, a organización do festival baiés tivo que ir buscar máis cadeiras e quedou sen papeletas para as votacións do público. 

A entrega de premios celebrouse baixo unha fermosa noite na carpa da praza Jorge Mira, chea de aplausos e apertas. Uns premios que puxeron o foco na mocidade con dous premios que recaeron en alumnado de centros de ensino.

O premio do público, entregado polo vicepresidente da Deputación, Xosé Regueira, foi para o CPI Cabo da Area de Laxe pola curta Un, Dous, Tres, Ataque de Pánico.

O premio do xurado á mellor curta escolar, entregado polo alcalde de Zas, Manuel Muíño, foi para o IES Agra do Orzán pola peza Un guión de Cinema.

O premio do xurado á mellor curta da Categoría Xeral foi entregado polo padriño e a madriña da IV Edición, Chema Rey e Mabel Montes, e recaeu na película Homes Traxe, de Daniel Filloy e Rebeca Tella. O xurado destacou a calidade técnica da peza, gravada en plano secuencia, e os xiros do guión.

Organización

A organización destacou a implicación de todo o pobo, así coma os apoios dos patrocinadores, o Concello e a Deputación, necesarios para consolidar o festival no futuro. A cita xa mira cara a vindeira edición o ano que vén co reto de implicar máis as novas xeracións. 

Máis novas dos Premios