Un dos temas que máis debate vén xerando nos últimos meses, o cambio de Plan Competicional no fútbol galego, tivo o seu desenlace o día 23 de xullo na Asamblea da Federación Galega. Como estaba cantado, a parte máis polémica do Plan, e que afectaba directamente ós clubes costeiros, saiu adiante. Aínda que está falado e máis que falado, resumirei un pouco como queda a situación.
- Para a tempada que empeza, a 2011/2012:
- Preferente. 20 equipos, 2 ascensos, 4 descensos.
- 1ª Autonómica. 18 equipos, 2 ascensos, 2 descensos. Non haberá arrastres de Preferente.
- 2ª Autonómica. 18 equipos, 2 ascensos, 2 descensos. Os ascensos dependen dos equipos que fagan falta para completar a 1ª autonómica do ano seguinte.
- 3ª Autonómica. 16 equipos, 3 ascensos.
- Para a tempada seguinte, a 2012/2013:
- Preferente. 18 equipos, 2 ascensos, 4 descensos.
- 1ª Autonómica Costa/Barbanza/Santiago. 18 equipos, 2 ascensos, 4 descensos.
- 2ª Autonómica. 18 equipos, 2 ascensos (ata completar 18 equipos da 1ª), 1 descenso.
- 3ª Autonómica. Os equipos que se presenten, 3 ascensos.
Con estes datos, unha análise rápida fainos ver que, baixo o meu punto de vista, tanto a categoría de 3ª autonómica, que prácticamente queda igual que está agora, como a de 2ª autonómica, se ven beneficiadas co novo sistema. Esta tempada 11/12
en 2ª, a loita polo ascenso vai ser frenética, tendo en conta que posiblemente ata 3 ou 4 equipos teñen posibilidades de subir a 1ª. Polo mesmo non haberá arrastres no descenso, manténdose os 2 descensos de siempre.
Na tempada 12/13 a categoría sufre unha reestructuración de equipos, pasando de 18 a 16, moi necesaria para cadrar as datas da competicion e sobre todo para que
non aconteza
o que vén pasando
estes anos coa Copa da Costa, que se está a devaluar por coincidir Liga e Copa nas mesmas fins de semana, dando lugar a situacións estranas e realmente esperpénticas. Insisto, a redución de equipos fará unha categoría máis competida, co engadido dos 2 ascensos directos que substitúen aos actuais 1 directo e outro á promoción.
Ata aquí todo correcto, pero o punto máis polémico témolo na
división da 1ª Autonomica coruñesa en dúas, quedando os equipos da Costa encadrados no grupo II, cos clubes de Santiago e do Barbanza. Sen dúbida que isto é do que máis se vai falar nas próximas datas, pois de inicio supón romper o cordón umbilical que une históricamente á Costa coa zona de influencia da cidade da Coruña. Queda moi
deslucida esa 1ª para os clubes costeiros, que onde antes xogaban contra clubes como Arteixo, ou Sada, agora os rivais serían os Lamela, Calo ou Ribeira, clubes, sen menosprezar a ninguén, con menos atractivo inicialmente. Si que é verdade que se a Costa demostra o potencial que todos pensamos que atesora, quen sabe se nun futuro non moi lonxano, esa 1ª autonómica non estará plagada dos mellores equipos costeiros, configurando así unha Liga da Costa a máis alto nivel, e máis preto da Preferente. Dentro do negativo da noticia, niso estaremos todos de acordo,
sexamos positivos e aproveitemos a situación para situar ós nosos equipos o máis alto posible. Agora mesmo a Costa está nun dos mellores momentos dos últimos anos, con 3 equipos en Preferente. Fagamos todos forza e apoiemos para que eses equipos manteñan o nivel, e poder así sumar nos próximos anos a outros que por capacidade económica, deportiva ou traballo duro, poidan chegar onde Soneira, Dumbria e Xallas están agora.
Un comentario aparte merece a actitude dun dos clubes históricos da Costa, o Bergantiños. A decisión tomada de trasladar as categorías base ás Mariñas, rompe definitivamente o lazo que xa nos últimos anos se foi facendo máis débil, que unía ó clube carballés coa Costa. Ábrese un perigoso precedente de categorías á carta. ¿Que pasa se mañá os clubes máis cercanos á Coruña estiman que prefiren xogar nas Mariñas, ou na 1ª Autonómica coruñesa? ¿Como vai reaccionar a Federación? Ademais, ese desprezo por parte dos dirixentes bergantiñáns a todo o que teña que ver coa Liga da Costa, dándolle as costas ó que foi viveiro continuo durante moito tempo de futbolistas magníficos que xogaron ó maximo nivel en Carballo, posiblemente fará que a Costa devolva ese xesto con outro parecido, prantexándose a pregunta que anda no aire dende fai tempo:
¿É o Bergantiños un clube da Costa? E eu fágome outra, a nivel personal: se o Bergan descende a Preferente, ¿que copa vai a pedir xogar: a da Costa ou a das Mariñas? Porque cecais, o día que o clube de Carballo queira volverse aproveitar do inesgotable viveiro que é a Costa, quen sabe se non terá as portas cerradas. No mundo do fútbol a experiencia dinos que é mellor manter portas abertas, pois nunca sabes cando che vai facer falla entrar por elas. Veñen á miña cabeza un par de nomes dos mellores xogadores que deu a Costa nos últimos anos: Miguel Filgueiras e Alberto Ventureira, Repi, que despuntaron xuntos no Bergantiños para voar lonxe, ter carreiras exemplares e voltar para dar as suas ultimas leccións á Costa. ¿Volverá isto suceder?
Máis novas
Fonte
