Día de despedidas nos centros da Costa da Morte. Hoxe traemos dúas despedidas.

Por Baio, xubilouse Esther Agra, unha persoa que leva traballando no IES Maximino de Lema case que trinta anos. A comunidade educativa quixo compartir un xantar con ela para despedila e agradecerlle o seu traballo, compromiso, xenerosidade... e que coidou o Centro como a súa propia casa.

En Cabana, quixeron tamén render homenaxe ao mestre cabanés Xosé Ramón Lema Mira. O profesor, oriúndo de Corcoesto, desenvolveu parte da súa vida laboral na escola unitaria de Borneiro e no CPI As Revoltas, onde exercía a docencia desde o ano 2000.

O salón de plenos da casa consistorial acolleu emotivo acto de homenaxe no que participaron alumnos, familiares, compañeiros e membros do executivo local.

Como parte dos actos de homenaxe, o alumnado do CPI As Revoltas versionou un dos temas da agrupación Fuxan os Ventos adaptando a letra a unha nova dedicada ao mestre. Ademais, durante o acto celebrado no concello, o rexedor fíxolle entrega dunha réplica en miniatura do Dolmen de Dombate.