Íntegro cambia de nome para abarcar toda a Costa da Morte

07:07 09/03/17

Imaxe da Asemblea de Íntegro

Que a Asociación Íntegro traballaba en toda a Costa da Morte xa se sabía. Pero a entidade vén de rubricalo ata no nome. O pasado sábado, na Asemblea, dentro dunha xuntanza festiva, celebrada no Centro de Recursos de Nantón, aprobaban a modificación o ámbito de actuación da asociación e, por conseguinte, a súa denominación. Tras un amplo debate entre os socios/as, a decisión foi unánime e procedeuse a súa aprobación pasando a chamarse “Asociación INTEGRO das persoas con Diversidade Funcional da Costa da Morte”. O novo nome, ademais de englobar as comarcas de Bergantiños, Terra de Soneira e Fisterra, aporta unha fácil e rápida localización do territorio e fai alusión unha marca de calidade, con identidade propia e sobradamente coñecida.

A Asemblea deu pasi a un ambiente moito máis festivo e relaxado que comezou coa celebración dunha sesión vermú a cargo dun dúo musical moi especial, composto pola nosa logopeda, Beatriz Loureiro, e o seu compañeiro, Ricardo Blanco. A ritmo de cumbia, pasodobre e chachachá, os convidados foron tomando asento para degustar un cocido á altura dos padais máis esixentes e ao que non lle faltou detalle.

Ao longo da tarde houbo actividades para todas as idades, sorpresas, máis baile, agasallos e, sobre todo, momentos para rir, conversar e compartir coa familia e os amigos/as. Grazas a todos e a todas por asistir e parabéns ao noso equipo polo traballo realizado.