Íntegro normaliza a diversidade nas escolas

07:00 13/03/17

Integro no CPI As Revoltas

A Asociación Íntegro, xa co novo nome costeiro, segue coas súas actividades de concienciación. E as que se fan nos centros de ensino teñen un carácter especial, porque van dirixidas a un público tremendamente absorvente, sobre oq ue poden cambiar toda unha mentalidade con realidades directas. Saben dende a asociación que é fundamtenal que a mocidade vexa de preto como é a diversidade, para naturalizala e asumila como normal, un dos pasos claves da inclusión.

Nesas ideas se basa o programa Capacíta-T e as accións formativas de sensibilización que o pasado venres levaron aos membros da entidade ao CPI As Revoltas, en Cabana de Bergantiños Nesta ocasión, os alumnos e alumnas de 3º e 4 da ESO foron, xunto cos máis cativos/as, os e as protagonistas dunha xornada destinada a xogar, educar e concienciar sobre a diversidade. E o resultado foi espectacular!

Pola súa banda, os estudantes de secundaria participaron nunha sesión informativa sobre prevención de lesións medulares, dentro da campaña que estamos a levar a cabo en numerosos centros educativos de primaria e secundaria da Costa da Morte. O presidente de Íntegro, Adolfo López Baña, e o vicepresidente, Ramón Pombo, foron os encargados de explicar as principais causas e consecuencias de sufrir unha lesión medular durante a charla teórica que impartiron aos alumnos/as co obxectivo, ademais, de conciencialos sobre a importancia de previr prácticas de risco en praias e piscinas ou en accidentes de tráfico para evitar danos irreparables. O relato das súas propias experiencias persoais deu paso á posta en práctica da destreza dos escolares sobre unha cadeira de rodas comprobando así o difícil que resulta desprazarse coa mobilidade reducida. Aínda así houbo quen se atreveu a botar unha carreira!

Mestúra-T en infantil

Pero os momentos máis simpáticos e sorprendentes viñeron da man de Mestúra-T, unha versión infantil do noso programa de sensibilización dirixido a concienciar aos máis pequenos mediante o xogo e o entretemento. E foron, precisamente, os alumnos de 6º de infantil os que, unha vez máis, nos deixaron impresionados/as coa súa naturalidade, espontaneidade e gran capacidade de asimilación. A directora do Centro de Recursos de Íntegro, Noelia Barreira, e a nosa psicóloga, Begoña Rial, achegaron a diversidade e a inclusión aos escolares de 5 anos mediante contacontos de sensibilización e diferentes actividades lúdicas nas que se empregaron técnicas tan divertidas como a caracterización para representar escenas cotiás da vida das persoas con diversidade funcional. Unha experiencia moi enriquecedora que ven a reforzar a nosa aposta por unha educación inclusiva dende a infancia e unha aprendizaxe en valores.

Queres que visiten o teu colexio?

Se queredes que Capacíta-T ou Mestúra-T visiten o voso colexio ou instituto, non tedes máis que poñervos en contacto co centro chamando ao 981 734 985.