O programa PIMD Rural, que desenvolve a asociación Íntegro coa colaboración da Consellería de Política Social e Igualdade da Xunta de Galicia, vén de pechar con éxito un taller de busca activa de emprego por internet, no que participaron varias mulleres do rural con ganas de mellorar as súas oportunidades laborais.

O PIMD Rural vai dirixido a mulleres en situación ou risco de exclusión social, especialmente aquelas con dificultades para acceder ao mercado laboral. A través de orientación personalizada e accións formativas como este taller, o programa busca mellorar a empregabilidade e promover a inserción sociolaboral no medio rural.

A formación, centrada no uso de ferramentas dixitais para atopar emprego –como o manexo de plataformas online, a elaboración de currículos ou o envío de candidaturas– tivo moi boa acollida entre as participantes, ata o punto de que xa está prevista unha segunda edición para o mes de xullo. “Fixemos grupos pequenos para adaptarnos ben ás necesidades de cada muller, e mesmo así houbo lista de agarda”, explican desde Íntegro.

Inscrición

Aquelas mulleres interesadas en participar na próxima edición do obradoiro ou recibir información sobre o programa poden poñerse en contacto coa asociación mediante o mail info@integro.es ou no teléfono 981 734 985.

Máis novas