A celebración das festas nos portos das nosas vilas ten como consecuencia unha afectación directa sobre o noso litoral. Botellas, plásticos de todo tipo… acaban no mar, ante a pasividade máxima das administración.

E volve a sociedade civil a que saca as castañas do lume. Volve ser o voluntariado de Mar de Fábula o que demostre, nun exercicio de civismo, a necesidade de Concello e Portos de Galicia fagan algo.

A pasada mañá de mércores, un grupo de voluntarios de Mar de Fábula foron apañar por mar e por terra toda unha morea de lixo plástico, vidros e latas espalladas ao longo da parede do porto e aboiando nas augas, resultado das festas do Carmen. Enfangados até os xeonllos a pé e axudados pola súa lancha a flote, os nove valentes participantes fixeron un traballo hercúleo, enchendo 10 sacos de 100 litros de lixo plástico e multitude de porcallada que nunca máis volverá a contaminar o mar.

”Está ben que celebremos as festas que para iso son pero o que non está ben é que deixemos esta pegada de suciedade, abandono e desleixo no mar onde tres días antes levavamos a patroa dos mariñeiros a bordo para que bendecira ese mesmo mar”, reflexiona Xosé Manuel Barros, lembrando que acontece o mesmo en Laxe, Muxía, Corme, Malpica, Corcubión… e o resto das vilas. ”É o sino dos tempos, dunha sociedade de excesos. Parece que non podemos divertirnos sen deixar unha paisaxe de desolación para o día despois. Pode ser que haxa un mecanismo que falla na nosa autoestima e dignidade colectiva como país”.

A alcaldesa lembraba onte polas redes sociais a Portos de Galicia a necesidade de levar a cabo a limpeza do peirao 2-3 días despois da festa.