Da Circunvalación seguimos sen novas, pero outra das necesidades en materia de infraestruras do Concello de Carballo parece que dá, por fin, un paso cara adiante. A Xunta vén de anunciar a adxudicación da redacción do proxecto de interese autonómico (PIA) da ampliación do parque empresarial de Bértoa. O contrato, de 62.436 euros, é para a empresa Proyfe S.L.,

A previsión que se manexa é que o documento se envíe á Consellería de Medio Ambiente, Territorio e Vivenda no mes de outubro e reciba a aprobación inicial a comezos do vindeiro ano.

A redacción do PIA, que foi licitada a finais de 2021, permitirá a ampliación do parque empresarial de Bértoa nunha superficie de máis de medio millón de metros cadrados, máis da metade dos cales son xa propiedade do Instituto Galego da Vivenda e Solo.