O IES Monte Neme abre as súas portas dos seus Ciclos Formativos este xoves

O IES Monte Neme abre as súas portas dos seus Ciclos Formativos este xoves

16:49 15/06/22

Moito falamos estes días da oferta de FP na Costa da Morte. Pero é que experiencia formativas, con tanta saída como a do IES MOnte Neme, merece a atención.

E para comprobalo, podedes achegarvos este xoves 16 de xuño ao IES Monte Neme, situado na rúa Nacente do Concello de Carballo, pois celebra unha xornada de portas abertas. Poderanse visitar os talleres e as aulas dos ciclos de formación profesional. O horario establecido para a visita dos talleres é de 10 a 14 horas e, para a visita das aulas, de 11 a 14 horas. Os e as estudantes e o profesorado recibirán ás persoas interesadas e amosaranlles os traballos realizados durante o curso escolar, así como os recursos e os espazos. O obxectivo é dar a coñecer os ciclos de formación profesional do centro.

A oferta formativa

O instituto imparte estudos formativos de catro familias profesionais:

A familia administración e xestión ofrece dous ciclos formativos de distinto nivel. O alumado de ciclo superior pode cursar administración e finanzas e os e as estudantes de ciclo medio poden formarse en xestión administrativa.
Na especialidade de electrónica, o alumnado pode optar ás prazas do ciclo superior de sistemas de telecomunicacións e informáticos e ás prazas do ciclo medio de instalacións de telecomunicacións.
Na rama eléctrica, o ciclo que se oferta no instituto, de nivel medio, é instalacións eléctricas e automáticas. A familia profesional fabricación mecánica está representada no centro co ciclo medio de mecanizado.
A familia instalación e mantemento oferta ao alumando o ciclo superior de mecatrónica industrial.

Ciclo Dual como novidade

Este ano a novidade para o bienio 2022-2024, é Ciclo Superior DUAL Mecatrónica industrial. Non é a primeira vez que se oferta este ciclo no IES Monte Neme. Implantouse, por primeira vez, no bienio 2020-2022, con moi boa acollida por parte do alumnado e das empresas. Ao impartirse pola modalidade dual, non se ofertan prazas de primeiro curso todos os anos, como sucede nos ciclos de réxime ordinario.

A formación do alumado en dual esténdese durante dous anos que se distribúen alternando a presenza na aula e na empresa. Nos períodos de setembro a marzo, os e as estudantes asisten ao centro de ensino e, de abril a agosto, fórmanse na industria. Os meses de estancia nas empresas os alumnos e alumnas perciben unha bolsa de cincocentos euros.

O número total de prazas ofertadas é de 12. As industrias participantes distribúense por toda a comarca. As empresas Conservas Calvo, en Carballo, e TMC Cancela, en Tordoia, ofrecen, cada unha, tres prazas. Malasa, en Cerceda, e Cerámica Campo, en Laracha e Mesía, ofertan dúas prazas, respectivamente. As empresas que se unen á formación dual cunha praza son Unemsa, en Coristanco, e Placasa, en Carballo.