Vieiro expón aos centros educativos de Carballo a súa oferta de programas de prevención
Membros da xunta directiva da Asociación Vieiro reuníronse coas orientadoras dos centros de educación secundaria do municipio de Carballo co obxectivo de presentar e ofertar os programas do ámbito educativo da entidade e reforzar a prevención das condutas aditivas no ámbito escolar.
Representantes da xunta directiva da entidade e das orientadoras dos distintos centros de educación secundaria do municipio.
A presidenta de Vieiro, Josefina Rey Baldomir, e a secretaria, María del Pilar Mata Fernández-Balbuena, mantiveron unha reunión informativa coas Orientadoras dos centros educativos carballeses: Mara Lema Agra, orientadora do IES Isidro Parga Pondal; Andrea Liñares Pazos, orientadora do IES Alfredo Brañas; Noelia Martínez Ferreiro, orientadora do IES Monte Neme; e Cristina Baldomir, orientadora do CPR Artai.
Durante a reunión, a entidade aproveitou para lembrar ás responsables dos departamentos de orientación os programas incluídos na carteira de servizos que a Asociación Vieiro desenvolve no ámbito educativo, coa colaboración da Xunta de Galicia, da Deputación da Coruña e do Concello de Carballo. Así mesmo, trasladouse información sobre os resultados obtidos durante o pasado curso escolar nos programas levados a cabo pola entidade, nos que todos os centros do municipio veñen participando desde hai anos.
