Vieiro reflexiona sobre as emocións nos centros de ensino
![Educadora Social Miriam Romero Traba de Vieiro](/asset/thumbnail,992,558,center,center/media/quepasanacosta/images/2022/10/11/2022101114401998319.jpg)
O programa escolar “Na Horta cos meus amigos/as”, que usa as verduras e hortalizas para tratar as emocións, volve aos centros de ensino de Carballo. A Asociación Vieiro puxo en marcha un ano máis este proxecto dirixido a nenos e nenas de 3º e 4º de Educación Primaria.
Un programa que trata de “contribuír á maduración psicoafectiva, á adquisición de hábitos de saúde e benestar e ao inicio dun traballo preventivo sobre condutas de risco en etapas máis temperás”.
A través dunha serie de contos coas verduras como protagonistas, trátanse temas como os medos, as burlas, os prexuízos e a discriminación, as mentiras, as trampas, os celos, os castigos inxustos, as diferenzas físicas e culturais, a presión de grupo, a resolución de problemas e a identificación de emocións, entre outros.
Trátase de conseguir co programa “Na horta cos meus amigos/as”, que os nenos/as aprendan a expresar correctamente as súas emocións, de que falen do que senten, e a partir de aí comprender que eses sentimentos son compartidos polos seus compañeiros/as e que existen diferentes formas de reaccionar ante eles.