A Esmu de Carnota puxo o broche de ouro ao curso enchendo o local da Pedramar

12:34 22/06/17

A Orquestra Orff da Esmu de Carnota durante o festival de fin de curso

Traíamos onte unha completa galería do Festival de Fin de Curso da Escola de Música de Cee, e temos que facer o propio coa Esmu de Carnota.

Este mesmo mércores 21 de xuño tiña lugar no Local da Asociación Pedramar, no porto do Pindo, o Festival de clausura do curso. Máis de 200 asistentes conseguiron que un local tan grande se quedase pequeno, demostrando, unha vez máis que esta ESMU segue sendo o buque insignia da cultura musical da zona!

Cheo no Local da Pedramar do Pindo no Festival da Esmu de Carnota

Coa cita dábase por finalizado este curso 2016/2017 (se ben as clases aínda rematan o venres). Un curso especial para os máis de 140 alumnos de todas as idades. Entre eles unha nena que despois de 6 anos na ESMU carnotán, presentouse ao acceso a grao profesional ao Conservatorio de Noia e aprobou, co que, a partir do vindeiro curso, seguirá os seus estudios pianísticos de maneira profesional xa nun conservatorio.

Un ano que tivo varias citas especiais como o concerto por Santa Cecilia (patroa da música) e a participación no concurso promovido pola Deputación de “Quero cantar”, con composición propia.

De feito, os bravos artistas xa prepararon o tema deste ano para a a segunda edición do certame Quero Cantar, en clave reagge:

Pensando no curso que vén

Toca xa pensar no curso que vén, que terá unha novidade sustancial, xa que probablemente para o vindeiro curso a ESMU xa será no Local socio-cultural do Viso.

Así, as inscricións para o seguinte curso 2017-2018 abriranse na primeira quincena de setembro no Concello, no departamento de Cultura e Deportes ou no rexistro xeral.