Venres. 19.07.2024
El tiempo

Carnota celebra os 10 anos da Mostra de Semana Santa Víndemo Ver

Vindemo VER Carnota 2023
Carnota celebra os 10 anos da Mostra de Semana Santa Víndemo Ver

Xa afianzada, xunto coa Semana Santa de Fisterra e a Mostra do Encaixe de Camariñas, como unha das 3 principais citas da Semana Semana Santa da Costa da Morte, a Mostra de Promoción Local Víndemo Ver-Mercado da Deputación de Carnota cumple o seu 10 aniversario.

Os días 6, 7, 8 e 9 de abril, a praza San Gregorio de Carnota converterase no escenario dun mercado de principios do século pasado (invitan a acodir disfrazados, por suposto), cunha gran variedade de produtos da horta, ecolóxicos e de proximidade, xunto cun amplo abano de postos de artesanía de creadores locais. Ademais destes espazos, distribuiranse pola praza diferentes postos de comida e bebida para degustar ao aire libre.

O evento contará tamén cunha ampla oferta de actividades paralelas, como accións lúdicas para a rapazada xogos tradicionais, circo, clowns xincanas, etc.
Non faltará a música tradicional pois estarán amenizando o ambiente os Gaiteiros San Mamede, a Charanga Santa Compaña ou o coro de Chan de Lamas.

Para amenizar as noites haberá música e teatro. O xoves 6 de abril ás 22:00 Concerto de Chiña no posto de So’nos. O venres 7, ás 21:00h teremos Teatro Vero Rilo "Tralalareira" e a partir das 23:00 Concerto de "La Banda de ayer". E para rematar, o sábado 8, a partir das 22:00 os Concertos de Leilía e La Quinkillada.

A X BTT e Andaina

Unha das máis exitosas citas, que provoca ademais que veña moita xente e quede á feira, é a BTT. Será o venres 7 de abril e a saída farase ás 09:30 dende o patio do CEIP plurilingüe de Carnota e haberá 2 percorridos, un longo e outro curto.
Nesa mesma mañá e paralela a BTT, organizarase unha xincana para a rapazada, coas súas propias bicicletas, tamén no patio do colexio, de 12:00 a 14:00. Para esta última actividade non é necesaria inscrición previa (idades recomendadas de 5 a 12 anos e obrigatorio o uso do casco).

Como xa ven sendo habitual tamén está incluída na programación unha andaina temática que este ano será “A ruta do millo”. O sábado 8 terá lugar a saída, ás 09:30, dende o hórreo de Carnota. Nela poderemos ver distintos exemplares de arquitectura popular vinculada ao millo como hórreos, muíños e eiras. Será unha ruta circular de arredor 9 km.

Exposicións

Os asistentes/as poderán tamén visitar durante os catro días as seguintes exposicións na carpa grande, no posto do Concello de Carnota-Deputación da Coruña:

  • Maqueta “A época dourada do millo en Carnota” .
  • Exposición de aparellos de labranza do S.XX “Debullando na memoria de Carnota”.

Novas relacionadas

Comentarios