Dende 1996 leva con este proxecto o artista vimiancés afincado en Londres Antonio Nodar. Un proceso longo, un proxecto ben completo, co que Nodar quere establecer un diálogo entre a cámara e os artista. Máis de 1.000 de todo o mundo teñen posado para el, e estes días son uns 160 os que se expoñen a si mesmos no Museo de Arte Contemporánea Gas Natural Fenosa da Coruña.

”The Galicia Album” da exposición From portrait to self-portrait está na Coruña, tras pasar, iso si, por Vimianzo. Son 160 retratos, neste caso os galegos, feitos por Nodar coa súa cámara, e as 160 correspondentes intervencións deses 160 artistas sobre a mesma imaxe. “Do retrato ao autorretrato”, como di o nome, nesta orixinal proposta que convirte a exposición nunha obra de centos de artistas.

Onte tiña lugar a inauguración, e poucas veces acontece que a xente non queira baixar aos pinchos nesta clase de eventos. Pero aló enriba, na primeira planta, estaban todos, unha marea de espectadores e outros tantos artistas que se ollaban a si mesmos. Verdadeiras obras de arte as que se ven na obra, verdadeiros artistas ao servizo deste humilde e universal creador soneirán.

Presencia costeira

Durante a inauguración, ademais de Nodar, falou o alcalde de Vimianzo, un Antelo que non levaba nada preparado pero sacou de orgullo vimiancés reivindicando a visión máis aberta da Costa da Morte.

Entre os 160 retratos, atopamos a presencia de 3 artistas costeiros. A nosa colaboradora, a muxiá Viki Rivadulla, que xa tivera a ben falar da proposta dende a Sala do Perello, é unha das galegas elixidas por Nodar e, como non, deixa ver a súa alma mariñeira na revisión do seu retrato.

Vemos tamén a Xesús Búa, que acodía escoltado por unha familia con moita arte, para ver o seu legado. Un legado que recorda aqueles anos 90 nos que, aínda sen photoshop, facían verdadeiros "colages" recortando fotografías e pegándoas unhas enriba das outras. Así fixo esta intervención, acompañada da súa benquerida recta de Boallo, que lle dirixe a casa.
I é que Búa é vello coñecedor de Nodar, e xa van máis de 20 anos que se coñecen. De feito, Búa foi o encargado de expoñer aos alumnos dos centros de ensino de Vimianzo a obra de Nodar, na proposta municipal de achegar aos artistas da casa ás xentes da casa chamada "Orgullosos do noso".

O terceiro costeiro autoretratado é Nando Lestón, pintor, escultor… carnotán, que tamén deixou a súa pegada “ghallegha”.

Se pasades pola Coruña, non deixedes de vela, a exposición sitúase no Museo de Arte Contemporánea Gas Natural Fenosa, á entrada dende a AG-55 na Coruña, e estará aberta ao público ata o vindeiro 25 de xaneiro de 2015.

En vídeo

Máis información

• From portrait to self-portrait.

Novas relacionadas

• Viki Rivadulla na Sala do Perello: Dos retratos de Antonio Nodar aos autorretratos dos nosos gobernantes.
• De London a Vimianzo co auto-retrato de Antonio Nodar.
• A vida despois do lume, con Nando Lestón.

Fonte

• Redacción de QPC (info@quepasanacosta.gal).