Xa hai programa en Carnota para o Día das Letras Galegas, e as actividades de dinamización lingüística e cultural irán dirixidas fundamentalmente ao público infantil e familiar. Uns días que serven para promover o uso da lingua galega e divulgar a figura de Xosé María Díaz Castro, autor homenaxeado este ano con motivo da celebración do Día das Letras Galegas.

O xoves 8 de maio o alumnado do CEIP de Carnota e da EEI de Portocubelo gozará do espectáculo “Merenda con pan de millo”, a cargo da compañía Migallas Teatro, coa participación de María Campos e Carlos Yus. A función, que terá lugar no CEIP de Carnota ás 12:00 h, combina música e a narración oral en lingua galega, co proceso de elaboración do pan de millo como fío condutor.

O luns 12 de maio terán lugar dous espectáculos infantís que integran narración oral en lingua galega, expresión dramática e música en directo.
Por unha banda, o alumnado do CEIP do Pindo e da EEI do Viso, asistirá á función “Contos nas Orellas”, un animado espectáculo que engloba un conto tradicional, un conto de autor e un conto musicado. A actividade terá lugar ás 11:00 h no CEIP do Pindo.
E por outra banda, as nenas e os nenos da Escola Infantil A Galiña Azul de Carnota gozarán, xunto cos seus familiares e educadores, cos “Contos do Chupete”, un espectáculo concibido para bebés e familias, que se desenvolverá no propio centro educativo, ás 12:15 h.
Ambas as funcións corren a cargo da actriz Bea Campos e o músico David González, integrantes da compañía Migallas Teatro.

Novas relacionadas

• Unha exposición, uns títeres e unha obra de teatro en Fisterra polas Letras Galegas.
• Un completo Festiletras facer país dende o Couto.

Fonte

• Redacción de QPC ([email protected]).