O BNG de Cee reclama a instalación dunha marquesiña no lugar de Tedín

Cee

08:09 13/09/17

Os membros do BNG esixen tamén a reparación da marquesiña situada na estrada que vai cara Ruibo Recén estreado o curso escolar, o BNG de Cee vén de presentar unha moción sobre a colocación dunha marquesiña no lugar de Tedín. Segundo explica Serxio Domínguez - o portavoz nacionalista en Cee - "os nenos e nenas que esperan o autobús en Tedín para acudir ao colexio fano á intemperie, sen un lugar onde resgardarse da chovia e do frío". A marquesiña existente na estrada que vai cara Ruibo xa non é útil a día de hoxe debido ao cambio de traxecto e que sitúa a parada actual na estrada de Lires-Toba. "É preciso pois a colocación dunha nova, nun novo lugar o mais axeitado posíbel, e que dea un servizo óptimo e oportuno ao alumnado do lugar, sinalan dende o BNG de Cee. Ademais indican que a marquesiña existente na estrada de Ruibo "supón un perigo" debido á oxidación das bases introducidas no formigón. "Pola situación da aldea, onde o percorrido pode ser cambiado dependendo das necesidades, si hai alumnado suficiente ou non, o lugar de Tedín debería dispor das dúas marquesiñas, da antiga que debería ser reparada e volta a colocar, e da nova no lugar adecuado", indican dende o BNG de Cee. Ésta non é a primeira vez que se trata este tema nun pleno. Así, en xaneiro de 2015 os membros do BNG presentaran un escrito solicitando o arranxo da situación e en agosto de 2016 volveron a facer a petición no pleno.