Xa sabemos cales foron os gañadores do V Concurso de Murais de Azulexo que artella Suministros Lar. Pero iso é o de menos, pois a proposta é máis educativa que competitiva.
Este ano, a entidade deulle unha volta á proposta e convertiu os murais en Velas de barco (unhas pezas de máis de 1.000 kg suxeitos a unha base de ferro en forma de Ombreiro de Mar) para facer reflexionar aos case 300 alumnos dos 11 centros participantes (8 centros educativos ademais dos centros de Aspadex, Apem e como novidade Íntegro) sobre a riqueza dos nosos Fondos Mariños.

Con ese toque de sensibilización medioambiental transcorreu a entrega de premios este venres 8 de xuño de 2012. E os centros con máis experiencia seguen demostrando o seu poder. Volveu gañar o IES Agra Raíces cos seus "Anacos de Mar".
O 2º premio foi para o Cabo da Area de Laxe, que traía uns inquietantes "Misterios do mar".
Outros que sempre levan premio, o IES Maximino Romero de Lema de Baio, este ano non fallou coa súa reflexión feita mural "Veu visitarme o mar".
Houbo novidades, iso si, o Manuela Rial, un dos novos que levou premio, desta volta, á Creatividade polas súas "Ondas de Memoria", que mesturaron historia e arte.

O Xurado cada ano está máis profesionalizado, e desta volta puidemos ver aos xa coñecidos Nacho Porto e Juan Creus, acompañados por Antón Castro, escritor, doutor en Historia do Arte pola Complutense de Madrid.

Formación e Integración

A verdade é que o certame está servindo para que os Centros de ensino fagan unha labor completa arredor do mesmo. I é que os alumnos aprenden de todo case sen darse conta: coñecen os materiais, traballan en equipo, establecen responsabilidades, realizan un proxecto en todas as súas fases, valoran o traballo dos colocadores, achéganse ao mundo profesional real...
Cómpre destacar que nos centros hai un traballo interdepartamental tremendo. Involúcranse o de plástica, o de ciencias, o de informática, o de galego, lingua castelá e lingua inglesa, e o de matemáticas. Traballan todos coordinados para un proxecto común, e por exemplo os de lingua preparan as memorias, en informática preparan a memoria en soporte informático ademais de facer montaxes de vídeo achega do proceso de elaboración do mural, na clase de matemáticas fixeron uns cálculos acerca da cantidade de pezas que o número levase pegados que veñen sendo unhas 6.000 pezas por número...

E que podemos dicir da fantástica a participación das entidades para discapacitados da zona, como son APEM e Aspades dende Cee, e Íntegro dende Cabana. Aquí vemos aos alumos do taller de enmarcación de Aspadex, dos que podedes coñecer un pouco mellor como preparon o mural a través do seu blog. Demostraron ademais a picardía que teñen e non esqueceron unha referencia imprescindible cando falamos de Fondos Mariños: Bob Esponxa, "Unha nova especie no mar”!

Obras presentadas

Podedes pasar polo Facebook de Suministros Lar para ver os murais e unha galeria da entrega de premios.

Novas relacionadas

• Alumnos de 4 centros únense á mundial Limpeza Simultánea de Praias.
• O proceso de creación dun mural cos alumnos do IESTerra de Soneira.
• Alumnos artesáns que coidan o mar.
• Os Fondos Mariños serán os protagonistas V Concurso de Murais de Azulexo da Costa da Morte.
• Un longo proceso de formación.
• 8 centros educativos e 3 asociacións de discapacitados participan no V Concurso de Murais Costa da Morte.
• Cabazas, bruxas, pantasmas e curuxas para o Samaín de murais de Zas.
• Concurso 2012: Arrinca o curso e ponse en marcha o V Concurso de Murais de Azulexo da Costa da Morte.
• IV Concurso 2011: Os institutos de Cee, Zas e Muxía acaparan os premios do Concurso de Murais de Azulexo de Lar.
• III Concurso de Murais 2009: O IES de Baio volve gañar o Concurso Benéfico de Murais de Azulexo de Lar.
• III Concurso de Murais 2009: Emotivo acto final do Concurso benéfico de Lar.
• 4 concellos adquiren os murais benéficos de Lar do II Concurso.
• II Concurso de Murais 2008: O certame de murais de azulexo deixa premios a catro dos sete participantes.
• II Concurso de Murais 2008: O concurso benéfico máis internacional.

Fonte

• Redacción de QPC ([email protected]).