Este pasado venres celebrouse a gran final da XIV Olimpíada cultural o Saber ten premio, unha das citas máis esperadas do ano no IES Fernando Blanco, "un sinal de indentidade" do centro ceense, que este ano chegou  á súa 14ª edición. Un fermoso xeito de educar xogando.

O concurso desenvólvese en dúas fases, unha primeira fase de preguntas que se desenvolven na plataforma aula virutal resolvendo 30 preguntas tipo test en 20 min, seleccionadas dun gran banco de preguntas, sobre contidos que se desenvolven en materias e módulos que se imparten no centro. Desas semifinais pasan tres equipos que compiten na Gran final que se celebrou o venres 13 á que acoden os representantes das empresas patrocinadoras, Xeal, Gerca e Ferretería Roget acompañados da dirección do centro e da inspectora de educación. 

Os tres equipos finalistas disputaron unha primeira fase de preguntas novamente en directo nun salón de actos completamente ateigado de profesorado, familias e alumnado. Os dous equipos de maior puntuación na fase de preguntas pasaron ao gran debate, que este curso tiña un tema moi interesante: Deberíase limitar o crecemento do turismo na Costa da Morte?

Os equipos Plato Hondo e Plato Llano fixeron un debate máis que interesante moi valorado polo xurado e deixando ao público moi contento en relación á defensa das súas posturas. Foi un debate con respecto, compartindo os seus datos e defendendo cada equipo a súa postura que foi precisamente sorteada nese momento.

O equipo gañador da XIV Olimpiada cultural O Saber ten premio foi Plato Hondo, seguido no segundo posto Plato llano e de terceiros o Equipo Rai.

Dende o centro educativo queren deixar claro mostrar o seu "gran agradecemento ás empresas patrocinadoras, a todos os equipos participantes, as preparadoras do debate, ao formador Juan Santamaría, profesor en Ourense e especialista en debates, ao presentador Paulo Calvo, ao xurado e acomisión organizadora.