Piden que o Concello de Cee abandone a Neria
As Oficinas da Neria sempre estiveron en Cee
Non serían os primeiros. A lo menos 5 concellos xa non forman parte da Asociación Neria, esa entidade supramunicipal que xestionou os fondos europeos durante máis de 20 anos na Costa da Morte. O último en intentalo, o Concello de Fisterra, pero a moción non saíu adiante.
Desta volta é en Cee, onde a Neria sempre tivo máis peso, onde piden que o Concello abandone a entidade. É o BNG local o que insiste en que é “unha entidade de carácter privado, á que hai que recoñecer que por un tempo mantivo unha función recoñecida e valiosa (…), pero que na actualidade é coñecida como ente que persiste a duras penas, que se resiste a desaparecer, en situación de quebra económica e técnica e imposibilitada para cubrir cos obxectivos orixinarios polos que se constituíu e traballou durante anos”.
Considera o BNG de Cee que “con tódalas dificultades polas que atravesa foise producindo a súa descapitalización e desmantelamento técnico, e orixinando que o seu principal cometido, a xestión de determinados elementos patrimoniais (museos comarcais, oficinas de información turística, dependencias de faros, etc) entrara nunha situación de empeoramento e xeralizada desatención, levando incluso a pechar varios destes recintos durante períodos prolongados”.
Ulo C3M?
O edificio da Rúa Magdalena que albergaría o C3M quedou a medias
O mellor exemplo é o coñecido como Centro de Coñecemento, que supostamente ía entrar en funcionamento en marzo de 2013… A “pioneira” iniciativa suporía un investimento de 1,2 millóns de euros, achegados a través do Plan Avanza do Ministerio de Industria, e tería como obxectivos achegar os cidadáns ao mundo da tecnoloxía, conectar a empresarios e emprendedores para proporcionar formación, e exercer de viveiro de empresas. “Aquel proxecto que ía estar na vangarda, puido ser o mazazo final da asociación. A empresa constructora que estaba a remodelar o edificio é una das principais acreedoras da asociación, e segue coa súa loita nos tribunais”, recordan dende o BNG local.
Ademais, a cousa está máis complicada porque “a subvención a fondo perdido e o crédito a longo prazo do Ministerio de industria, foron reclamados na súa totalidade por non satisfacer tan sequera a primeira cota, ao que haberá que sumar os intereses e os gastos de costas.
”A única saída de Neria é a disolución”
Ademais dos coñecidos problemas de índole laboral, mesmo con denuncias persoais pendentes de solventar, un recente informe asinado polo interventor da Deputación de A Coruña, resalta que a única saída de Neria é a disolución. Destaca que a “falla de viabilidade económica da entidade, deriva fundamentalmente da ausencia de xestión”. Os técnicos da Deputación, que tamén destacaron as dificultades que se atoparon para facer o informe, falan dunha débeda de mais 1,8 millóns de euros, ao que habería que sumar compromisos con outras administracións públicas, embargos e outros procedementos que poderían acrecentar, aínda mais, esa cifra.
Novas relacionadas- Marzo 2016: Xa son 5 os Concellos que abandonan a Asociación Neria.
- Xaneiro 2016: Mazaricos sae da Neria e busca abrir o Polígono.
- A Deputación auditará as contas da Neria
- 16-02-15: Piden unha auditoría das contas da Neria.
- Ata a Deputación denuncia as débedas da Asociación Neria.
- 04-12-14: Radiografía da Neria por unha ex traballadora.
- 30-11-14: A Neria, en quebra.
- 03-09-14: Denuncian adxudicacións ilegais á Neria.
- As frechas azuis van ao xulgado.
- Oficina de Turismo: Pechada por vacacións.
- O Museo sen luz.
- Unha viaxe política para vender o valor turístico do Camiño a Fisterra e Muxía.
- A Neria pon no tellado do Concello de Cee e da Deputación a apertura do C3M.
- 12-09-12: O C3M estará en marcha en marzo de 2013.
- 2011: A innovación tecnolóxica da Costa segue á espera do C3M.
- Agardando polos códigos Qr.
- Redacción QPC ([email protected])
