Última hora a que se vive nas fábricas de XEAL. Os traballadores convocan varias asembleas para o día de mañá para analizar a nova situación, unha vez que a dirección vén de romper as negociacións “de maneira unilateral” e deixa sen o convenio colectivo propio aos traballadores e traballadoras. Deste xeito, os traballadores terían que volver rexerse polo convenio colectivo do sector, que conta con moitos menos dereitos que os conquistados dentro da empresa ao longo dos anos.

De pouco serviu a mediación da AGA, pois na reunión mantida no Consello Galego de Relacións Laborais este martes, XEAL levantouse da mesa. “A empresa xa anunciou que non recoñece dereitos sociais consolidados no convenio colectivo, como o lote de nadal que se viña entregando dende hai máis de 40 anos, que non recibirán nin os traballadores/as en activo nin o denominado persoal pasivo (colectivo de xubilados/as, viuvez e persoal longa enfermidade), a quen tamén lle está recoñecido este dereito no convenio”, denuncian dende o Comité de Empresa.

Os traballadores consideran un novo paso no “deterioro progresivo que viven as fábricas de Cee e Dumbría dende a chegada hai dous anos do fondo de investimentos TPG-Ithaka”. E enumeran as razóns: rebaixa drástica da produción, recorte de emprego, falta de investimentos nas plantas, redución dos dereitos dos traballadores…

Asembleas e denuncias

Diante disto, o comité ten convocadas asembleas de traballadores e traballadoras para mañá, xoves 16 de decembro, ás 10 horas na fábrica de Brens e ás 12 na de Dumbría. Mentes que pola tarde haberá asemblea co persoal xubilado e pasivo, tamén afectado pola decisión da empresa, ás 18 horas, no salón de actos do Concello de Cee, para entre outras medidas chamar a mobilización.

De igual xeito, o comité xa avanza que levará a cabo todas as accións sindicais e xudiciais que sexan precisas para garantir o mantemento do convenio de empresa e na defensa dos dereitos que tanto lle custou conquistar ao persoal.

Neste senso, o comité tamén demanda da Xunta que “deixe de ser cómplice destes ataques de XEAL, que lle esixa o inmediato cumprimento das cláusulas das concesións (así como a sentenza do TXSG) e que proceda a reversión dos dereitos de explotación das centrais”.

NOVAS RELACIONADAS

• Novembro 21: Outro día na rúa para os traballador@s de XEAL.
• Outubro 21: O Comité de XEAL volve pedir a intervención inmediata da Xunta.
• 17-07-21: Cada vez máis demandas nas concentracións de XEAL.
• 09-07-21: O comité de XEAL denuncia na Inspección o proceder da empresa ante os casos de acoso laboral e sexual.
• 25-06-21: Denuncian que Xeal reduce o caudal ecolóxico do río Xallas con permiso da Xunta.
• 24-06-21: O emprego en XEAL volve ao Parlamento.
• 05-06-21: Un novo despedimento axita aínda máis a loita dos traballadores de XEAL :