A Deputación firma o seu compromiso coa Costa da Morte

Corcubión Costa da Morte

08:07 02/10/15

Visita da Deputación a Corcubión Con pouco máis de 100 días no cargo o presidente da Deputación da Coruña, Valentín González Formoso, decidiu facer onte a súa primeira visita á Costa da Morte na que participou tamén o deputado provincial José Manuel Pequeño, responsable da área de Vías e Obras do organismo provincial. Concretamente, a comitiva estivo nos concellos de Corcubión e Muxía, O presidente provincial visitou en primeiro lugar o concello de Corcubión, onde foi recibido polo alcalde, Manuel Insua, e por representantes da corporación municipal, cos que mantivo un encontro de traballo no que se plantexaron diversas posibilidades de colaboración entre ambas institucións, como melloras no saneamento e na cuberta do pavillón municipal da localidade. Manuel Insua agradeceu que o novo presidente da Deputación elixira dous concellos da Costa da Morte como destino da que é unha das súas primeiras visitas oficiais, e considerou o xesto como “un símbolo de compromiso” con esta comarca, que outros presidentes provinciais, como Salvador Fernández Moreda, xa mantiveran no pasado.

Pola súa banda, González Formoso afirmou que ambos mandatarios analizaron nesta primeira reunión “cuestións prioritarias do día a día, como a posibilidade de colaborar na mellora de infraestruturas municipais como o pavillón municipal, que require dun arranxo da cuberta” ou accións relacionadas co saneamento, “que levan décadas sen resolver e que é necesario abordar”. O presidente da Deputación da Coruña comprometeu o apoio da Deputación para “potenciar económicamente” a Costa da Morte e subliñou que a xeración de oportunidades laborales nas comarcas “para que a xente non teña que irse a traballar á Coruña, a Santiago ou a Ferrol” é “unha prioridade absoluta” para o Goberno que preside, pois “é a única maneira de que non se perda poboación e de que a chave do emprego exista”. Ruta dos Faros Sobre a proposta de varios alcaldes de mellorar as rutas que levan aos faros máis emblemáticos da comarca, González Formoso apuntou que é unha cuestión que o deputado José Manuel Pequeño expuxo en varias ocasións e que “estamos analizando polo miúdo porque nos parece moi interesante”. Neste sentido, apuntou que no pleno do vindeiro 8 de outubro aprobaranse cuestións importantes para a zona, como o proxecto de ampliación e mellora da estrada DP-5201 que vai ao Parador de Muxía, cun investimento previsto de máis de 1 millón de euros, que supoñen “unha aposta pola revitalización da economía de Muxía, que está vendo como por fin o Parador está sendo construido” e que precisa que as administracións “se impliquen no seu futuro”. No pleno de outubro aprobarase tamén a remodelación e acondicionamento da travesía de Senande, na DP- 3403, co obxecto de subsanar as deficiencias existentes, mellorar o estado, incrementar a seguridade vial e minimizar as barreiras urbanísticas, que suporá un investimento de 483.680, 38 euros e que podería comezar a executarse a curto prazo. González Formoso visitou ambas estradas acompañado polo alcalde de localidade, Félix Porto, que destacou o “desbloqueo de dúas obras de importancia vital” para o municipio que sufriron unha “paralización histórica”. “No caso da estrada do Parador dase un primeiro paso moi importante e no caso da mellora da travesía de Senande un impulso claro a unha obra necesaria”, afirmou Porto, que agradeceu o compromiso amosado polo goberno provincial nesta primeira visita. Volta ciclista Preguntado sobre a implicación da Deputación na promoción da provincia na vindeira Volta Ciclista a España, González Formoso explicou que tanto él mesmo como o deputado José Manuel Pequeño mantiveron reunións cos máximos responsables da organización deste evento deportivo para intentar que “ademáis do aspecto deportivo que todo o mundo ama e sigue”, e da importancia da Volta como escaparate dos múltiples atractivos turísticos da provincia, teña ademáis nesta edición unha vertente económica, “de presencia e promoción das empresas e dos productos da Costa da Morte en cada final de etapa, para que sexan coñecidos por toda España”. Neste sentido, o presidente provincial agradeceu o interese e a “predisposición” dos organizadores da Vuelta Ciclista a España para levar esta idea á práctica e comprometeu a “implicación” da Deputación na mesma.