O Solar do Cine Vello de Corcubión volve ás mans dos veciños

O Solar do Cine Vello de Corcubión volve ás mans dos veciños

11:10 22/01/18

Eterna singradura a do Solar do Cine Vello de Corcubión Longa historia a do Solar do Cine Vello de Corcubión. Ese espazo esquecido, convertido en perigosa selva no medio e medio dun casco vello declarado Conxunto Histórico-Artístico. Historia que parece achegarse a un final relativamente feliz, co aproveitamento, público, dunha zona privilexiada, que permitirá refacer e convertir a Praza Castelao nun verdadeiro centro social da comarca. O Concello iniciaba os trámites para recuperar o solar aló por 2009. En 2010 mesmo abría un concurso de ideas que agora están intentando recuperar. En 2015 o Solar do Cine Vello de Corcubión era declarado zona de interese público, xusto despois de que o TSXG botase abaixo o último recurso dos propietarios. E foi agora, este pasado xoves 18 de xaneiro de 2018 cando foi aprobado inicialmente, no pleno e por unanimidade, o proxecto de expropiación do solar do cine, no marco do Plan Especial do Casco Histórico. Logo dun mes de exposición pública poderase aprobalo definitivamente. "A expropiación vai ser posible grazas ao bo facer na xestión económica do equipo de goberno no Concello, xa que grazas ao remanente positivo de aproximadamente 200.000 € do ano 2016 poderemos acometela", explican dende o goberno. A expropiación dos 428m2 do solar custaralle ás arcas municipais uns 99.400 €, que é o "xustiprezo" no que valoran a este solar os informes técnicos encargados á Deputación.

Reforma integral

Dende o grupo de goberno, “entendemos que isto é moi importante para o futuro de Corcubión, xa que supón o primeiro paso para facer unha reforma integral da praza principal da vila, a praza de Castelao, que ten que convertirse nun futuro no referente principal do noso casco histórico. O obxectivo principal será humanizala con novos espazos peonís”, sinalan. A día de hoxe están “estudiando diversas opcións cos técnicos co obxectivo de encher de terra o buraco actual do solar, para que quede á altura do resto da praza e poder adecentar o solar con diverso mobiliario público para uso e disfrute de todos os veciños”.

Imaxe da Praza Castelao, o centro de Corcubión, co Solar do Cine Vello á esquerda

Concurso de ideas

Para elo actualmente o Concello conta cun convenio coa Escola de Arquitectura da Universidade da Coruña para que os alumnos, dirixidos polo prestixioso arquitecto Juan Creus, fagan propostas de reforma, e para elo recentemente disfrutaron dunhas xornadas académicas, con diferentes ponentes, na Capela do Pilar de Corcubión. Así que de aquí a uns meses poderemos ver algún proxecto xa presentado.