Ucha Velo investigado durante a sua etapa como alcalde de Santa Comba

Continúan os asuntos xudiciais sendo pan de cada día no Concello de Santa Comba, un dos máis investigados de Galicia. A Fiscalía vén de abrir unha nova investigación na que analiza as supostas irregularidades dun contrato a un bufete de avogados do Concello de Santa Comba durante a alcaldía de José Antonio Ucha.

A empresa contratada ingresaría máis diñeiro por outros conceptos que os estipulados no contrato, segundo a documentación que manexa o diario curmán Galicia Confidencial.

O pasado xaneiro a Fiscalía pedía copia dilixenciada e completa do expediente administrativo, tramitado como contrato menor de servizos de asistencia xurídica municipal do pasado ano. Os concellos e outras administracións, segundo a lexislación vixente, poden contratar servizos directamente, pero de xeito motivado, a empresas cando o prezo non supere os 18.000 euros nin o ano de duración. E isto é o que se fixo en Santa Comba para contratar o servizo xurídico.

Segundo sinalan os informes, Ucha Velo fixou como prezo do contrato tan só 5 céntimos menos do límite legal. Non obstante, o que chama a atención dese contrato, é que, ademais da facturación mensual, a empresa cobrará, a maiores, as costas dos xuízos --que por lei lle corresponden ao concello como recursos públicos que son--, e tamén a facturación a maiores daqueles xuízos de "maior contía" e todos os gastos de desprazamento, aloxamento ou manutención.

A Fiscalía pediu un informe porque entende que, con este sistema de contratación, estanse a evitar a emisión de informes xurídicos vinculantes, tanto do Secretario, como do Interventor do concello. O certo é que se se fixera o verdadeiro prezo do contrato --que con eses custos adicionais superaría con creces eses 18.000 euros--, sería obrigatoria e emisión dun informe por escrito. Ademais, a superación dese límite evitaría a contratación a dedo dunha empresa.
Segundo esa adxudicación de contrato menor, á que tivo acceso GC, os servizos contratados son defensas en xuízos, con contías de ata 36.000 euros, a realización de emisión de informes que sexan necesarios ou preceptivos na tramitación de expedientes municipais e a asistencia presencial no Concello de Santa Comba, cun máximo de catro visitas mensuais.

Fonte

• Galicia Confidencial.