O Museo da Pataca de Coristanco vai collendo forma
11:28 04/03/21
Bótase de menos a Festa da Pacata por Coristanco. Pero o Concello non está parado, e segue movendo un dos soños da vila, o “Museo da pataca”. Xa hai unhas semanas o alcalde coristanqués propuña na Xunta a elaboración un Plan Estratéxico da Pataca de Coristanco, aínda abeiro da IXP Pataca de Galicia, malia que a súa idea era crear unha “marca de garantía propia” para as patacas tamén de Carballo, A Laracha, Malpica e Ponteceso.
Unha das iniciativas da posta en valor do noso famoso tubérculo será o Museo. E para iso xa conta co apoio da Xunta, que confirmou a través da Axencia Galega de Desenvolvemento Rural unha achega de 37.000 euros.
Un museo dende punto de vista etnográfico, agrario e social e de identificación territorial. A través deste museo búscase poñer en contexto histórico a pataca de Coristanco e achegar este cultivo ao conxunto da poboación e aos seus visitantes, a través de exposicións permanentes baseadas en imaxes, vídeos animados e mostras dos diferentes apeiros de labranza empregados, co fin de amosar a evolución do sistema agrario de Coristanco e da súa bisbarra.
