O vindeiro sábado, a biblioteca Rego da Balsa celebra o seu primeiro aniversario Con motivo do seu primeiro aniversario e do Día da Biblioteca, a biblioteca Rego da Balsa de Carballo inicia hoxe unha semana cargada de actividades culturais especiais dirixidas a todos os públicos. Hoxe, ás 19:00 horas, terá lugar un faladoiro co polivalente Suso Lista, no que abordará as súas distintas facetas da súa vida: percebeiro, actor, escritor… contestando ás preguntas dos asistentes. Esta cita está dirixida ao público adulto. Durante toda a semana tamén se levará a cabo o obradoiro de radio que se inclúe dentro do programa do “Fiotiño”. E mañá mércores, ás 18 horas, un grupo de voluntarios narrarán uns contacontos para o público infantil. Xa o xoves 22 ás 18:00 h, Ángela Triana, unha poeta novel, fará a presentación da súa ópera prima “Celebra la Tormenta”, obra na que se abordan micropoemas cargados de sentimento. Durante a presentación realizarase ademais un pequeno e improvisado obradoiro de microrrelatos. A maiores de todas estas actividades, está a iniciativa “A Biblio nun día” que consiste na realización dun vídeo sobre o traballo do persoal durante o propio día 24, que se presentará para ser incluído no proxecto cinematográfico da directora de Isabel Coixet, #Spaininaday, e para o que piden a colaboración dos carballeses para achegarse a mañá do sábado á biblioteca e participar nela. Todas as actividades son gratuítas.

Novas relacionadas

• #ABiblioPréstame.
• O edificio dos 100 actos.
• Bergantiños á vangarda tecnolóxica galega.

Fonte

• Redacción QPC (info@quepasanacosta.gal)
• Concello de Carballo