A Costa da Morte secunda o rexeitamento contra a Reforma das Pensións

Cabana Cee Costa da Morte

A Costa da Morte secunda o rexeitamento contra a Reforma das Pensións

09:15 28/01/11

Máis de 200 persoas secundaron en Cee a folga contra a Reforma das Pensións do goberno estatal, que se desenvolveu esta mañá de xoves 27 de xaneiro de 2011 convocada pola CIG. E a sensación no seo do sindicato galego é positiva pois a incidencia da folga é semellante á folga xeral do pasado 29 de setembro, que fora convocada polos 3 sindicatos maioritarios. A concentración tivo lugar un día antes dunha "data fatídica para todo o estado", como sinalan dende a CIG, i é que este 28 de xaneiro o Congreso aprobará a devandita Reforma das Pensións. E se desenvolveu nun lugar tan simbólico como diante do INEM, na Praza do Concello de Cee. Alí, baixo o lema "En Defensa das pensións e do emprego", delegados sindicais, militantes do BNG de toda a bisbarra, e veciños e traballadores, entonaron cánticos como "As pensións son un dereito, non un negocio"; "Manda carallo! Nen subsidios nen traballo"; ou "Os postos de traballo de ZP, onde están? quen os ve?". O mesmo delegado da CIG Xabier Santos asegurou que se o estado aproba a reforma, (e ollo que terá moitas máis consecuencias das que nos estamos a decatar) "nós seguiremos coas mobilizacións".

Baixa incidencia no comercio e no funcionariado

Pero se a concentración saldouse cun seguemento relativamente positivo, o que non se pode calificar do mesmo xeito é o seguemento da folga. A meirande parte do funcionariado e do comercio non faltaron ao seu traballo. O mesmo delegado da CIG Xabier Santos destacaba que "hai problemas no comercio, sobre todo nas grandes superficies, como o Gadis ou Carrefour onde os traballadores, sempre contatados de xeito precario, teñen medo de que non se lles renoven os contratos". Onde si se notou a folga, como sucede habitualmente, foi na fábrica de Ferroatlántica. Aproveitando que os fornos están parados estes días, foron moitos os traballadores que secundaron a folga e que se achegaron ata a concentración. E houbo tamén algún grupo político que secundou a folga, con todas as consecuencias. En Cabana, o BNG local da man do seu voceiro David Cancela García, non acodiu ao pleno por considerar que eran cousas máis importantes as que se estaban a decidir co paro xeral.

Folga estudiantil

Tamén houbo na folga unha participacón da mocidade da bisbarra. Estudiantes de Galiza Nova Costa da Morte participou da mesma coa pancarta "Mocidade de Galiza, contra o Desemprego xuvenil e as reformas das pensións; co Emprego, por un pobo con futuro". De feito, sempre consideramos que os sindicatos tradicionais están a olvidar as ferramentas necesarias para achegarse á mocidade e facela participativa en todas estas sociais. E deste xeito a xuventude do pais síntense moi lonxe dos razonamentos e das esixencias dos sindicatos tradicionais.

Comunicado da CIG

Con esta folga xeral Baixo o lema “En defensa das pensións e do emprego”, estamos a dar unha resposta aos ataques contra a clase traballadora promovidos dende o goberno español. Foron con anterioridade os recortes salarias os funcionarios a reforma laboral, co abaratamento do despedimento e empobrecemento dos convenios, a eliminación da axudas de 426 € aos desempregados e desempregadas que esgotaron as prestacións . Reformas que se producen a par dunha voráxime privatizadora dos servizos públicos efectuadas tanto polo goberno do Estado como da Xunta, poñendo en marcha políticas agresivas destes gobernos contra a clase traballadora que se plasman nos orzamentos respectivos con enormes recortes no gasto social e na creación de emprego. Sumidos nunha profunda crise económica que non provocamos pero que nos fan pagar ademais de con estas reformas, coa brutal suba de prezos e impostos, IVE, carburantes, electricidade, entre outros. E con alarmantes taxas desemprego, sobre todo na mocidade. Agora tocalle o sistema público de pensións, que ten como claro obxectivo dificultar o acceso ás mesmas, aumentando os anos de cotización e a idade para xubilarse e reducir a contía das pensións futuras. Estas reformas non están xustificadas e a única maneira de frear estes ataques contra a maioría social é recorrer á mobilización. Recurren o uso de mentiras e manipulacións para xustificar as medidas que o goberno está a levar adiante, especialmente maliciosas no caso da reforma do sistema público de pensións, xa que nada ten a ver coa situación de crise. Os informes de supostos expertos que vaticinan a quebra do sistema; son documentos que veñen presentando de forma reiterada dende hai anos sen que polo momento acertasen nin unha soa vez nas súas predicións. Esta é unha reforma que unicamente interesa ao capital financiero, para fomentar os sistemas privados de pensións, que moven actualmente o 22% dos fluxos de capital mundial. Resulta escandaloso que se pretenda crear na opinión pública a idea de que o sistema actual non ten futuro, cando mesmo nunha situación de crise e desemprego tan brutal, a Seguridade Social segue contando cun fondo de reserva de miles de millóns de euros. E lamentábel a actitude de UGT e CCOO que, a pesar da reiterada negativa do goberno a retirar o incremento da idade de xubilación e do período para calcular a base reguladora, ambas organizacións sindicais continúen sentadas nesas mesas inutiles, pretendendo vender a idea de que é posíbel un acordo que beneficie os intereses da maioría social. O que NÓS non imos facer é, ante este ataque permanente e obstinado, permanecer pasivos ou protagonizando comedias ineficaces. CCOO e UGT deberán explicar por que hai unhas semanas tiñan tan claro a necesidade de convocar folga e agora permanecen nunhas negociacións das que é imposíbel que saian medidas favorábeis para os traballadores e traballadoras e que so serven para desmoralizar e desmobilizar a clase traballadora. Esta é unha folga pola dignidade da clase traballadora galega e baixo o convencemento de que só coa mobilización poderemos parar este goberno e os interese do capital financeiro a quen defende. Así que a loita estamola a dar antes do 28 de xaneiro data na que o goberno presenta o proxecto de lei, pero tamén despois se o goberno persiste no seu intento de sacar adiante a reforma do sistema público de pensións.