Estatísticas sobre o galego

11:57 18/05/16

A lingua galega evidencia síntomas de enfermidade. Dunha enfermidade que pode converterse en crónica. Non esaxero. Queredes datos. Datos dunha fonte fiable pola solvencia técnica, rigor da mostra utilizada e por tratarse dos máis recentes dispoñibles, na espera de coñecer outros máis actuais, pois aí van:

Estatisticas sobre o uso do galego en Galicia 2016

En 2003, a porcentaxe de residentes en Galicia que falaba sempre na lingua de Pondal estaba arredor do 43%. Sen embargo, en 2008 (29,96%) e no 2013 (30,84%) o retroceso dos galegofalantes é evidente. Situación distinta é a dos que utilizan sempre o castelán na fala. Fai trece anos representaban o 19,5% do total, pero en 2008 medran ata o 20% e aumentan tamén en 2013 ata preto do 26%. Deste xeito, observamos o significativo aumento dos que falan “castellano” en exclusividade. Así mesmo, os datos corroboran outra realidade incuestionable: a xente que utiliza máis o galego que o castelán diminuíu seis puntos porcentuais en 2013 respecto ao ano 2008; mentres que a porcentaxe dos que falan máis castelán ca galego apenas variou nestes anos. En fin, o lector pode extraer as súas propias conclusións. Pero, a obxectividade das cifras corrobora una realidade axiomática: a lingua galega está doente. Culpables: todos. Por iso chegou o momento de facer algo. Cada un como mellor poida ou saiba. Pero, todos, absolutamente todos debemos falar galego. Porque, para mudar a tendencia somos todos necesarios. Imprescindibles. Por certo, si fósemos capaces de transmitir o idioma aos máis novos, co mesmo agarimo con que o fixeron os nosos maiores, non precisaríamos lembrar a diagnose do bardo de Bergantiños que –como bo médico– receitou no seu día Os Pinos, para curar o mal.