Momento ideal para afiar a guerra contra as raíñas veluntinas

06:50 02/03/18

Que Carballo é un concello pioneiro na loita contra a veluntina xa o temos dito. E así o corroborou un dos apicultores que participaban onte nunha xuntanza informativa. “Polo que estamos vendo en todos os foros nos que participamos, Carballo é un concello pioneiro non só en Galicia, senón en toda España, na loita contra a avespa velutina”, asegurou o apicultor. Unha reunión para comezar o inicio da campaña de trampeo, aproveitando estes próximos tres meses, ata finais de maio, para intentar atrapar o maior número de raíñas cando esperten do seu letargo invernal, porque sen raíña non hai niño. Empeza, por tanto, unha época crucial para combater esta praga, e desde o Concello de Carballo solicítase toda a colaboración posible, como xa fixeron en Santa Comba. Os primeiros dispostos a colaborar, porque tamén son os máis afectados e os que mellor coñecen o terreo, son os apicultores. Hoxe desprazouse ata a Casa do Concello unha representación do sector para recoller as trampas e o atraínte. Este ano repartiranse 100 trampas novas, que se sumarán ás 300 do ano pasado.

Reunion de apicultores

Divulgación

O asunto está chegando ás escolas. Onte celebráronse as últimas charlas no CEIP Bergantiños, co cal completouse o mapa de centros de primaria do noso concello, pero a campaña estenderase tamén ao Canosa-Rus e a Aspaber. Isidro Rodríguez, representante da empresa do servizo de pragas, destacou a excelente acollida do programa, o intereses e o elevado grao de implicación dos nenos e nenas, que aprenderon a preparar as súas propias trampas con botellas de plástico e mesmo o atraínte con produtos de consumo doméstico habitual.